Dua belas buah rumah panjai di Ulu Lemanak deka disambung bekal karan

LUBOK ANTU: Dua belas buah rumah panjai Iban ba kandang Ulu Lemanak deka disambung bekal karan nengah projek mekal karan ngagai menua pesisir ti dipelajaika perintah, bedau lama udah.

Ku MP Lubok Antu Datuk William Nyalau Badak, projek ke beungkus RM12 milion nya mungkur projek ke berengkah ari simpang Berenggang nyentuk ke Telinting (Rumah Anding).

Bejaku ngagai The Borneo Post kemari, iya melabaka projek nya deka tembu dalam taun 2018.

“Betaun– taun aku udah nguji ngulihka karan ungkup kandang menua tu tang diatu baru bulih. Aku ngarapka rayat di Ulu Lemanak bulih utai ti dikedeka sida ngelama tu,” ku iya

Sebedau tu, kunteriktor mer deka nyambung karan ngagai 12 buah rumah panjai nya ketegal bedau datai jalai.

Diatu 12 buah rumah panjai nya udah datai jalai ke nyambung sida ngagai menua luar, ti ngujungka bisi pemar perengka guna nya disambung ke Ulu Lemanak.

Pengudah bulih projek nya, Nyalau arapka peranak di Ulu Lemanak nemu semina perintah Barisan Nasional (BN) ulih mai pemansang ngagai rayat.

Iya mega madah, semina nengah chara seruran betemu sereta bekempit enggau rayat aja iya ulih bejalaika pengawa enggau manah, nyadi pengari rayat.

“Pengundi ditu ngundi aku laban bisi kebuah lalu aku ditu bisi pengawa ti patut digaga. Semua ti digaga aku iya nya ke pemaik rayat di sitak aku, sitak parlimen Lubok Antu,” ku iya.

Berebak enggau nya beribu iku nyengkaum Nyalau udah ngulu pengawa nirika tiang karan keterubah ungkup projek nyambung karan menua pesisir Ulu Lemanak, bedau lama udah.

Sama bis datai, bala ketuai komuniti enggau tuai rumah.