PRU14: PRS deka diarika lima peratus chalun baru

KUCHING: Presiden Parti Rayat Sarawak (PRS) Tan Sri Datuk Amar Dr James Masing netapka lima peratus ari chalun ti deka ngarika parti ba Pengawa Bepilih Besai tu ila iya nya chalun baru.

“Taja pia, pekara tu bedau tembu laban deka dipansik aku,” ku iya ke mega Sapit Kepala Menteri sereta Menteri Pemansang Infrastruktur enggau Perengka Pengangkut.

Masing mansutka jaku nya ngagai pemberita pengudah nerima penemuai Sapit Menteri Besai Datuk Seri Dr Ahmad Zahid Hamidi nyerumba pengawa ngiling tikai di rumah iya ditu, kemari.

Ba penemuai nya, Zahid enggau Masing sereta raban ketuai bukai ari PRS bisi dipeda berandauka sekeda pekara ke diasai bisi kaul enggau rintai nama chalun ngarika PRS

Lebuh ditanya pemberita sentang batang randau sida, Masing madah pekara nya bedau ulih dipansutka maya tu.

“Ba maya ke engkeman ila, aku deka madahka ngagai kita sentang randau kami,”ku iya.

Ba pengerami ngelalu pengabang Kepala Menteri rambau Hari Raya Raya tu tadi, Masing bisi mansutka jaku diak PRS keran deka nyabung pengari ari raban orang Indu ba pengawa bepilih besai tu ila.

Ku iya, pekara nya dikena meri basa ngagai orang indu PRS ti udah meri sukung ngelama tu ke alai sida ngarika 50 peratus ari semua penyampau kaban parti.

Masing maya nya bisi madah pekara nya diatu diperatika enggau berat lalu parti sigi udah bisi chalun ngarika orang indu.

Ngenang kaul ke sama, iya pechaya PRS ulih ngenanka semua enam penuduk ungkup PRS iya nya Sri Aman, Lubok Antu, Julau, Hulu Rejang, Selangau enggau Kanowit.