Semua jalai tetap digaga, tang nitih pemisi belanja
Masing nyangkal penerang dalam surat kabar ti ngumbai iya mansutka jaku ‘no dam, no road’
KUCHING: Bisi palan tekat ai tauka enda, kandang menua di serata Sarawak tetap deka digaga jalai alun, ku Sapit Kepala Menteri Tan Sri Datuk Amar Dr James Jemut Masing.
Berindik enggau nya iya nyangkal berita ba surat kabar bedau lama tu tadi ti ngaga ripot dia iya bisi mansutka jaku ‘no dam, no road’- nadai projek tekat ai, nadai jalai alun.
“Berita ke ditulis nya bisi salah mimit, aku enda kala mansutka jaku munyi nya. Pemberita bejaku ngarika aku, nya ukai ari aku,” ku iya bejaku ngagai pemberita pengudah nerima penemuai Sapit Menteri Besai Datuk Seri Dr Ahmad Zahid Hamidi nyerumba pengawa ngiling tikai di rumah iya ditu, kemari.
Beambika chunto projek Jalai Pan Borneo, Masing ke mega Menteri Pemansang Infrastruktur enggau Perengka
Berita ke ditulis nya bisi salah mimit, aku enda kala mansutka jaku munyi nya. Pemberita bejaku ngarika aku, nya ukai ari aku. Tan Sri Datuk Amar Dr James Jemut Masing Sapit Kepala Menteri Sarawak
Pengangkut madah projek jalai nya digaga ukai ketegal bisi projek tekat ai.
Ku iya, Jalai Pan Borneo ke beungkus RM17 bilion nadai bisi kaul enggau pengawa ngaga palan tekat ai ba pengujung jalai.
“Jaku ke dipansutka aku iya nya semua jalai deka digaga tang ketegal penyuntuk ba pekara belanja, kitai meseti ngaga jalai ba kandang endur ke diasai patut digaga dulu.
“Mayuh belanja dikena ngaga jalai ulih dipulaika baru. Ambika chunto jalai nuju Bakun, belanja nya dipulaika baru ari palan Tekat Ai Bakun.
“Baka nya mega jalai ke digaga nuju Palan Tekat Ai Balleh ti begunaka belanja RM2 bilion, belanja tu ulih dipulai baru ari palan tekat ai tu,”ku iya ke mega Presiden Parti Rayat Sarawak (PRS).
Ngenang pengawa kemari, Zahid datai ngabang pengelama lebih 2 jam ba rumah Masing.
Bela nyempulang Zahid, Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah, Sapit Menteri Dalam Menua Datuk Masir Kujat enggau sida bukai.