IM S’wak mujur nyungkak pengidup orang indu ti bedagang di menua pesisir
KUCHING: Program Pengawa Dagang ti dipejalaika iMalaysia Sarawak (iM Sarawak) mujur ngubah nasit raban orang indu ti bejalaika pengawa dagang mit enggau jelan iya pemesai sereta ruang bilik sida ti diau di kandang menua pesisir enggau menua ulu nengeri tu.
Kaban Kunsil Penyanding Penemu iM Sarawak, Irwan Zulkarnain Muhamad Hasbie madah kenyau ari iya berengkah dipejalai dalam taun 2013, sepenyampau 1,663 iku pesereta udah teulihka pemaik ari program nya.
Piak iM Sarawak, ditumbuh kena meri lalau sentang peminta komuniti di nengeri tu.
“Kenyau ari 2013, piak kitai udah bejalaika 29 bengkah renggat program di Sarawak iya nya di Kuching, Sibu, Miri, Kapit, Samarahan, Serian, Sri Aman, Bau, Simunjan enggau Saratok.
“Sebedau projek tu dipejalai, suah agi kitai deka minta timbal ari akar umbi ngambika milih di dalam kandang menua ti begunaka program ke bansa nya.
“Piak kami bekerejasama enggau kaban pengari menua menua baka Kaunsil Pelilih ngambika merambu penyereta bala oesereta enggau ngeletakka kriteria kena milih iya nya orang dagang nya empu patut bisi bejalaika pengawa dagang baru ti mit,” ku iya lebuhka bejaku rambau aum pengarang berita, apin lama ke udah di Medan Niaga Sematan.
Penyelai program tu iya nya pengudah diberi kus, piak sida deka bejalaika tampung pen- gawa ngabas kelimpah meri mentor ngagai bala pesereta dikena matau orang dagang sekalika tagit sida tejapai ari sukut penambah penatai pemisi.
Iya dipejalai enggau nyiri mentor ari luar ti ngembuan mayuh peneleba abis nadai 12 taun sebedau ngembing bengkel program nya.
Nengah pengelandik ti diajar iya nya ngelala makit, chara komunikasyen, ngatur pekara belanja pengelama dua hari.
Iya mujur nukar gaya dagang kitai ngambika kreatif agi dikena ngaga perambu enggau strategi timpuh panjai sereta nambahka penatai pemisi enggau engawa dagang, ku iya nyetemak.
Bela diberi pemerat ngambika bala pesereta nguji ngena perengka guna arus sambung internet dikena ngemai produk sida ngagai makit seriris enggau juluk perintah nengeri deka ngadaka ekonomi digital.
Perintah nengeri udah melanjaka sepenyampau RM2 biliun dikena ngemansang sereta ngangkatka pemanah perengka guna arus sambung internet kelebih agi ungkup guna enggau pemaik orang dagang ari kandang menua pesisir enggau menua ulu di nengeri tu.
Ba lansa ke bukai, pejalai urung dua jam pengelama ari Mengeri Besai Kuching dibai piak iM Sarawak ngagai Medan Niaga Sematan betemu enggau Christina Salimin, 45 taun penatai asal ari Kampung Temaga Dayak.
Ingatka pesan indai dikesayau ti kala nyebut ‘Anang kelalu lemi, pengawa ti ulih dikereja sida ke lelaki, kitai mega ulih tang anang enda ingatka pangku pengawa kitai nyadi orang indu’.
Pengudah ngulu kus pengawa orang dagang enggau iM Sarawak taun nyin tadi ke alai iya netapka diri ngubah nasit enggau ngujika pelin baru terus mansang, ku iya nambah.
Iya keterubah suba dikangau piak Kaunsil Pelilih Lundu (MDL) nyereta kus nya, lalu ngujika nasit diri.
Bepun ari nya, iya ti sebedau nya nangi sereta enda entu andalka diri angkat lalu diatu bisi penatai pemisi ti betambah.
Enti dulu suba penatai pemisi semina chukup makai aja tang diatu iya mujur teulihka penatai pemisi manggai RM4,000 sebulan.
“Terubah bedagang suba, aku endang enda entu nemu, bisi nangika diri rugi, enda berani napi pengerugi, pengudah ngulu kus, diajar ngatur pekara belanja sereta besimpanka belanja.
“Diatu sayur mega dijual ngagai urung 200 premis baka ngagai Palm Beach Chalet, inap desa enggau kedai- kedai makai ngelingi Lundu enggau Sematan ninting hari.
“Bekal aku ngambi ari peranak ditu, aku empu ngiga, kaban belayan ke bisi betanam. Taja pia enda ngena media rama, tang chara komunikasyen enggau bala pelanggan. Chara aku ngiga pelanggan nengah pengawa betelefon,” ku iya tuchum.
Pia mega, Sulasteri Karim, 37 taun seiku perenchit nerima peransang ari laki iya, Mohd Nazrul Firdaus Abdullah, ngulu kus diatur iM Sarawak.
Berekat ari peransang laki iya, diatu Sulasteri ti datai ari Kampung Senari, Jalai Bako bisi dagang renchit ti majak ngerembai di Kampung Temaga Dayak.
“Dulu suba kala bekereja di Johor Bahru begulai enggau laki aku tang ngasaika enda entu mujur, kami duai laki bini mulaika diri lalu laki aku berengkah nyimpan puku semina enggau pengawa betanam.
“Endang enda ulih disakal suba kami duai semina ulih meli sebuah mutusikal tang diatu udah bisi kereta enggau sebuah lori dikena bebelika barang sereta nganjung peminta kuih tauka katering ngagai pelanggan,” ku iya.
Sulasteri berengkah muka kedai renchit ba dapur rumah iya dalam taun 2006, tang asail ari pengerembai dagang kedua iya diatu nyauka ulih ngaga sebuah bilik kedai renchit baru.
Iya ke suba enda andalka diri, diatu udah berengka ngembuan runding positif lalu beterima kasih enggau pemisi program nya ti mayuh mantu ngemansangka sida sebilik.
Sehari tu, piak Opis Pengintu Pengelantang Raban Bansa ( JKM) bela mantu ruang bilik tu nengah AZAM Kereja enggau meri sebuah injin marut nyiur, injin tebu, chiller enggau freezer di kedai iya nya.
“Suba endang tusah, bala anak agi mit, enggau gaya ekonomi ti kurang endar, suah agi ngetatka diri lapar.
“Enda kala putus pengarap, aku seiku aja ti bisi kedai di genturung pendiau ditu, tambah mega laki aku rindu agi bedagang lalu empu ngaga kek enggau kuih,” ku iya.
Kedai renchit diberi nama M Box Corner, mansutka penatai pemisi manggai RM2,000 ngagai RM2,500 ngagai sida Sulasteri sebilik.
Iya bisi juluk deka nyual mayuh agi bansa kek enggau barang renchit ungkup guna tetiap ruang bilik jemah.
Ba Tunas (Lucy) Redy, 46 taun, nusuk manik, tuah datai pengudah anak lelaki kedua ti beumur 24 taun bebadi di jalai alun.
Taja ati indai iya anchur luluh ngenangka nasit anak diri, tang iya dulu suba semina ngaga kerepek enggau penatai pemisi RM500 sebulan diatu teulihka belipat agi ari penyampau nya.
Lucy berengkah rindu nusuk manik dalam taun 2001 lalu kala nerima pelajar pemun ngaga manik di sekula sekondari lebuhka belajar ba Pom Tiga.
Indu tu berengkah chakah dalam seni manik dalam taun 2014 dataika sehari tu lalu penatai asal ari Kampung Seropak.
Diatu Lucy enggau sida sebilik diau di Kampung Jagoi Duyoh, Jalai Krokong.
“Suba aku ngaga dagang kerepek tang pengudah iya (anak) sakit mar endar aku ke dapur laban ke nyaga iya, aku nguji ngaga kraf tangan manik seraya nyaga anak.
“Bisi manik ti dibeli aku di pasar laban rindu meda lalu tu nyadika chunto kena aku nusuk manik diri.
“Mayuh agi asil aku ari bansa diri laban enggaika pengawa asal diri lenyau, tambah mega mayuh pelanggan ti dekaka barang kraf tangan ari bansa Bidayuh empu,” ku iya, ke alai dagang iya bela disaup sida sebilik.
Lucy ngupah tiga iku anak menyadi indu iya lalu ipar iya nyaup nangkup peminta enggau dijual ba pesta tauka festival ti disereta iya.
Iya madah kenyau ari ngulu kus ti dibuka iM Sarawak mayuh meri buah penemu ngagai iya kelimpah nemu chara makit produk.
“Peneleba ti dikunsi mega beguna endar ngagai iya ngasil mayuh agi barang ti bisi kualiti.
“Juluk ati deka muka galeri kelebih agi musim pengerami taun baru. Aku mega beterima kasih ngagai piak AIM enggau TEKUN ti udah mayuh mantu meri jali.
“Tu ti ngasuh aku alit ati nama kebuah aku ngaga kerepek taja aku rindu agi nusuk manik, tang Tuhan meri semua ngagai aku, tuah anak aku benung sakit, diatu aku udah bisi landik ba semua pengawa,” ku iya tuchum.