Chapel St Peter Kubu Mali patut dijaga enggau manah
SKRANG: Urung 2,000 iku peranak bisi ngulu Program Merarau Ngiga Belanja Sekula Primari kena Hari Enam.
Sida ke bisi datai nyengkaum bala kaban gerija enggau chapel, bala ketuai komuniti, bala kaban komiti pemansang enggau pengelikun genturung pendiau (JKKK), bala kaunsilor pelilih Lubok Antu sereta bala tuai rumah ari Lidong, Lipat enggau Kejemut antara kandang menua ke bukai.
Kaban Kunsil Nengeri (ADUN) Engkilili Dr Johnical Rayong Ngipa rambau program gempuru merarau udah ngemendarka geran Projek Transformasyen Menua Pesisir (RTP) penyampau RM200,000 dikena ngemanah sereta ngemesaika Chapel St Peter Kubu Mali, Skrang.
Chapel St Peter Kubu Mali iya nya pemadu tuai udah didirika di Skrang.
“Pengeraja asal Chapel St Peter Kubu Mali, digaga raban pengerembai pengarap Kristian dulu suba dalam taun 1830, patut dijaga sereta diintu enggau manah,” ku Rayong madah.
Nyadi chapel St Peter Kubu Mali digaga baru dalam taun 1963, diatu perabung enggau tiang penungkat iya patut dikemanah enggau jampat, ku Rayong seraya ngansak komiti pengatur pengawa chapel gawa rat begulai enggau Opis Kereja Raya (JKR) Sri Aman.
Iya dekaka chapel tu madah ngagai JKR nama ti patut digaga nyengkaum ngaga begunan balai chapel sereta nyambung bekal ai enggau karan ngagai chapel ari baru projek RTP 2017 iya.
Berebak enggau program ke sama, ku iya, tu diada nyadika teladan ti manah ba penegap kaul peranak pupu bansa enggau megai mayuh jalai pengarai di nengeri Sarawak.
Dr Rayong muji raban komiti ngatur pengawa chapel diketuaika chairman iya, Mambu Harry ti udah mujur ngatur program sehari nya.
Kaban Parlimen ( MP) Lubok Antu Datuk William Nyallau Badak, Sekretari Peribit Nyallau Jaini Aji, Penghulu Betok, ex-Penghulu Mapang, Kaunsilor Nyambong Mawing, Kaunsilor Chaong Maringai, Kaunsilor Bangkong Maweng, Rev Stephen Ngambong, Rev John Bujang sereta Rev Jerry Rumpang sekeda bala ke bisi datai.
Rambau program nya, Dr Rayong mega bisi ngemendarka geran penyampau RM10,000 ngagai komiti pengatur pengawa chapel. Nyallau bisi ngemendarka RM10,000 da agi ungkup raban komiti.
Dr Rayong mega bisi mayar rega mija rambau program merarau nya.
Nangkan nya, Dr Rayong udah nyuaka chek perintah sepenyampau RM10,000 ngagai JKKK Rh Karin dikena ngemanah rumah sereta masang kipas sereta RM5,000 da agi ungkup Biro Indu iya bebelika kereban berapi ke baru.
Rambau program nya mega, bala ketuai komuniti sereta sekeda kaban JKKK ari sekeda genturung pendiau bisi mantaika diri taluk ngagai Nyallau sereta minta bala ketuai Barisan Nasional (BN) ngirai Nyalau bediri minta pilih baru di Lubok Antu maya pengawa bepilih parlimen tu ila.
Pengawa bepilih tau diatur sebarang maya dalam tengan taun keterubah taun baru.