Isu MA63: Nadai penanggul enda ulih diputar perintah
Perintah Besai sedia bebasaka penerang asil pansik ke deka dibai raban undang-undang nengeri tu ari London
KUCHING: Perintah Besai sedia bebasaka semua penerang ari Perintah Sarawak nengah raban pakar undang-undang betuaika Menteri Muda ba Opis Kepala Menteri (Undang-undang, Kaul Sarawak enggau Perintah Besai, enggau Matau Projek), Sharifah Hasidah Sayeed Aman Ghazali ke deka dianjung ke London (United Kingdom) mansik hak Sarawak nitihka Sempekat Malaysia 1963 (MA63), ku Sapit Menteri Besai Datuk Seri Ahmad Zahid Hamidi.
“Sigi hak Perintah Sarawak enggau Sabah beratika undang-undang sereta penemu rama dataika bisi sempekat tu (MA63).
“Kami ba renggat Perintah Besai ngembuan runding ke tebuka deka nerima tauka bebasaka semua timbal ari Perintah Sarawak nengah pengawa mansik MA63 tu.
“Nadai sebarang penanggul ke enda ulih diputarka....Ba penemu aku, Perintah Besai nitihka udah dipadah Menteri Besai, Datuk Seri Mohd Najib Tun Razak, nya pekara ke ulih diperundingka, ba penemu Perintah Besai deka terus muka pintu berunding kelebih agi penerang ke diterima ari sekeda dokumen ke ulih dipansik seraban pakar undang-undang tu,” ku Ahmad Zahid.
Iya madah munyi nya lebuh dirandau pemberita pasal pejalai seraban pakar undang- undang betuaika Sharifah Hasidah, deka dianjung Perintah Sarawak ke London pasal isu MA1963 pengudah ngulu Pengerami Ngiling Tikai diatur Sapit Kepala Menteri, Datuk Amar Douglas Uggah Embas ba rumah Uggah di Taman BDC ditu, kemari.
Sebedau tu, Kepala Menteri Datuk Amar Abang Johari Tun Openg maya nemuai ngabang nyeruma Pengerami Nerima Pengabang Hari Raya AidilFitri ba Sibu, kena Hari Lima tu tadi, madahka Sarawak deka nganjung seraban pakar undang-undang ke London, United Kingdom ngambi beratika sempekat enggau hak Sarawak nitihka MA1963.
Nitih ku Abang Johari, Sarawak tetap majakka penemu niang Datuk Patinggi Tan Sri Adenan Satem (exKepala Menteri Sarawak) mansik hak Sarawak nitihka MA1963.
Iya madah, sempekat tu ukai ditempa sengapa laban Sarawak deka nemu pekara ke amat laban sebedau Sarawak deka minta hak menua tu diambi pulai, pengawa mansik MA1963 enda tau enda dikereja, ari Sarawak semina ‘ nimbak tang enda kena tagit’, ku iya, taja pan maya dikerandau ba aum media nya kemari, Abang Johari bedau nyebut tauka madahka nama sida ke dikenuku dianjung ke London.
Sama datai nyempulang pejalai Ahmad Zahid ngulu pengerami tu iya nya, Kepala Menteri Datuk Amar Abang Johari Tun Openg enggau bini iya, Datin Amar Dato Juma’ani Tuanku Bujang, Menteri Pengawa Dagang Temuai, Seni enggau Adat Pesaka, Nembiak, Lumba enggau Main, Datuk Abdul Karim Rahman Hamzah, Menteri Kaunsil Kandang Menua enggau Pengawa Berumah, Datuk Prof Dr. Sim Kui Hian, enggau sekeda menteri kabinet menua bukai, sapit menteri, ADUN sereta ex- Sapit Kepala Menteri Datuk Patinggi Tan Sri Dr Alfred Jabu anak Numpang enggau bala bukai.
Kami ba renggat Perintah Besai ngembuan runding ke tebuka deka nerima tauka bebasaka semua timbal ari Perintah Sarawak nengah pengawa mansik MA63 tu. Datuk Seri Ahmad Zahid Hamidi Sapit Menteri Besai Malaysia