Seiku peranak Rh Siliver lenyau pengudah nurun ngabas panjuk

SRI AMAN: Seiku orang tuai ari Rumah Siliver Garit, Kampung Kenyungan, Batu Lintang Undop, Sri Aman dipelabaka lenyau pengudah nadai pulai ke rumah panjai sida di Kampung Kenyungan kenyau ari dua hari tu tadi.

Pemesai Opis Penyaga Mensia Mayuh (APM) Pelilih Sri Aman, Siti Huzaimah Ibrahim madahka, orang tuai tu benama Mungam Bajak, 76 taun dipelaba nurun ke kebun urung 1 kilometer penyauh ari rumah panjai sida.

Nitih ku iya, orang tuai tu mindah kediri aja lalu semina ngena baju chelum sereta tanchut pandak, beketapu sereta mai duku, bekal asi enggau ai kupi.

“Iya dipelaba nurun ke kebun laban deka ngabas panjuk ti ditan iya kandang beberapa hari sebedau nya,” ku iya. Tandu iya, berindik ari apai tuai tu nadai mulaika diri nyentuk lemai kemari, sida sebilik udah ngaga ripot polis pasal penyelenyau iya di Opis Polis Sri Aman tumu pagi kemari.

Berindik ari penusah nya, seraban raban APM Sri Aman begulai enggau Opis Bomba enggau Penyah Penusah Sri Aman udah digerah ngelawa palan penusah nyadi nyaup peranak rumah panjai nyidi iya.

Operasyen ngaul raban APM, Opis Bomba enggau Penyah Penusah Sri Aman, Polis enggau ngaul 15 iku peranak rumah panjai udah dilanchar urung pukul 8.30 pagi kemari nyaup nyidi iya.

Operasyen nyidi enggau nyelamat apai tuai tu udah ngaul enam iku raban APM, semilan iku raban bomba, dua iku polis sereta 15 iku peranak rumah panjai,” ku Siti nandu.

Siti madahka, sida nyidi orang tuai nya mungkur babas besemak langkau kebun.

“Kesemua raban penyidi enggau nyelamat udah bebagi tubuh ngagai tiga raban ti bela disereta piak APM, Bomba enggau Polis,” ku iya nerang baru.

Naka berita tu ditulis lemai kemari, orang tuai tu apin ditemu.