Peranak Baram lebih randaka jalai alun enti dibanding enggau tekat ai, ku Elias
MIRI: Peranak Baram begunaka agi jalai alun ti menyana nyambung sida enggau menua luar lalu mai bemacham pemansang, dibanding enggau tekat ai ti digaga ngena belanja ke besai.
Chairman Dayak Think Tank Group (DTTG) Pampang Miri Elias Lipi Mat, madahka enggau pemisi jalai alun ti menyana, sekalika digaga baru tauka nengah pengawa ngemanahka jalai batang ke bisi diatu, peranak Baram ukai semina bisi sambung terus ngagai dunya luar, tang mega ulih nyungkak pengawa ekonomi, ke lalu nyadi peransang ngagai pemansang di Baram dudi hari.
“Tu juluk kami, peranak Baram, kenyau ari kelia. Jalai alun ti deka disempulang enggau bemacham pemansang ungkup rayat,” ku iya dalam sebengkah penerang berita ditu, kemari.
“Mayuh udah pansik dipejalai bekaul enggau pemesai guna infrastruktur, kelebih agi jalai alun, ti meri mayuh pemaik dikena mansutka asil betanam betupi, pengerembai ekonomi enggau pengawa ngurangka tikas penyeranta peranak.
“Nangkan ke nya, infrastruktur jalai alun tu mega meri pangka ngagai awak kereja enggau awak penatai pemisi ke bukai ngagai peranak bekaul,” ku Elias nandu.
Kelimpah ari nya, ku iya, enggau pemisi jalai alun ti menyana, iya mega tau ngemai penguntung bukai ngagau komuniti ari sukut penambah ba penatai bala anak ke sekula, nerima perubat enggau jampat sereta muntang agi kelimpah perengka guna ke bukai ti ulih dilawa nengah jalai.
Taja pia ku iya, penerang ti dikeluarka Sapit Kepala Menteri ke lalu nyadi Menteri Pemansang Infrastuktur enggau Perengka Pengangkut Tan Sri Dr James Jemut Masing, ba sebengkah surat berita Jaku English bedau lama ke udah, sempama baka ‘numbakka’ juluk peranak Baram deka bisi jalai..
Ku Elias, ukai semina DTTG aja, peranak Baram mega tekenyit enggau penerang nya, ti bela mantaika pengasa ati diri, laban endang nyata, rayat deka agi ke jalai dibanding sebuah tekat ai, ti deka ngasuh sekeda kandang menua ti ngembuan pemanah rampa menua tenggelam nyadi tasik, ti tau dikemansang nyadi palan dagang temuai, nyema bisi jalai penyambung ti menyana.
“Nyerenih tetiap leka jaku disebut Sapit Kepala Menteri tu endang ngasuh peranak Baram chukup sinu, lebuh sida beguna sereta dekaka agi jalai ti menyana dibanding enggau tekat ai,” ku iya nandu.
“Sekalika iya (Masing) nadai peneleba ti diasaika lebuh Kapit nadai jalai, ngujungka pemansang mar sereta laun dibai ngagai bagi menua nya.
“Sekalika tu nyadi polisi baru perintah bejalaika sistem barter iya nya nyilih juluk sida enggau ngaga tekat ai, ngambika jalai ulih digaga, enggau nenggelamka tanah pesaka aki ini sida,” ku iya nanya.
Penerang dipansutka Masing ti madahka ‘nadai tekat ai, reti iya nadai jalai’ digaga perintah, kelai timpal ba peminta nginsil projek jalai Long Lama-Ulu Baram, dikumbai enda pratikal agi, laban pengawa nginsil projek Tekat Ai Baram.
Nyema Tekat Ai Baram digaga, tu deka ngasuh lebih 20,000 peranak asal Sarawak ari 25 etnik asal lenyau menua enggau tanah ti nyadi pendiau sida, kelimpah lenyau endar sida begigaka pemakai dikena neruska pengidup besehari sehari.
Nitih ku Elias agi, pengawa ngaga projek Jalai Long LamaUlu Baram dikumbai enda pratikal agi, laban tuju ke bendar jalai nya ukai semina ungkup peranak tang mega digaga ungkup Tekat Ai Baram.
“Enti sema jalai tu digaga lalu peranak mindah ngagai menua ke bukai ti likun agi laban tekat ai deka digaga din, sapa ti deka nengah jalai nya ila?”
“Tang nyema tuju ngaga jalai tu ungkup peranak sereta nyadi alternatif ngagai sida nyambung enggau ngemai tama pemansang nya ulih diterima,” tandu iya nyemetak.