Ketuai raban bansa patut kreatif ngatur pemansang
Perintah deka meda sida chakah sereta ransing ngatur pemansang ke pemaik nembiak redak: Harden
SRI AMAN: Bala ketuai raban bansa di pelilih menua tu diperansang ngemeranka runding ti kreatif, chakah, inovatif sereta panjai runding dikena ngemansangka tumpuk pendiau enggau rumah panjai di sitak menua dipegai sida empu.
Menteri Muda Pengintu Pengelantang Komuniti Sarawak, Datuk Francis Harden Hollis nyema ketuai raban bansa bisi biuh baka nya, tentu tumpuk pendiau tauka rumah panjai sida deka mansang sereta pulaika penguntung nembiak redak iya.
“Perintah dekaka pengudah tu, sida ti megai tanggungpengawa ketuai ngatur pengawa di rumah panjai enggau tumpuk pendiau nukar chara sida gawa ngatur nembiak redak ti kreatif agi seriris enggau pemansang kemaya hari.
“Tinggalka chara ngatur pengawa ti lama lalu tukar ngagai iya chara ti kreatif enggau inovatif ngambika ulih mai penguntung ngagai semua piak kelebih agi rayat ari baruh pegai sida,” ku iya.
Iya ke mega Kaban Kunsil Nengeri (ADUN) Simanggang mansutka jaku tu rambau bejadika Pengerami ‘Marun
Perintah dekaka pengudah tu, sida ti megai tanggungpengawa ketuai ngatur pengawa di rumah panjai enggau tumpuk pendiau nukar chara sida gawa ngatur nembiak redak ti kreatif agi seriris enggau pemansang kemaya hari. Datuk Francis Harden Hollis Menteri Muda Pengintu Pengelantang Komuniti Sarawak
Kasah’ (Ngiling Tikai) diatur Parti Sa’ati Rayat Sarawak (SUPP) Pati Braang enggau Komiti Pemansang Enggau Pengelikun Genturung Pendiau (JKKK)Kampung Semban dalam sitak Mambong bepalan di Balai Komuniti Skim Pengentap Baru Pen- diau Kampung Bengoh.
Ku Harden nambah, seiku ketuai ngatur pengawa patut panjai runding sereta suah ngatur baum enggau bala nembiak redak lalu sedia mendingka penemu bala bukai ungkup pemansang begulai.
“Nyema bisi bala ketuai ngembuan ulah ke bansa tu, tentu tetiap perambu ngemansangka tumpuk pendiau enggau rumah panjai sida deka mujur,” ku iya.
Berebak enggau nya, Harden mega ngingatka bala ketuai raban bansa nyediaka profail tumpuk pendiau sida empu nyadika chuan dudi hari.
“Pengawa nyediaka profail tumpuk pendiau beguna endar laban tetiap penerang bekaul rumah panjai enggau tumpuk pendiau patut dipasuk ke dalam profail nya.
“Profail tu ukai semina nyadi chuan peranak rumah panjai enggau tumpuk pendiau aja tang mega ejensi perintah baka Opis Residen, Opis Pelilih sereta KEMAS ti suah begunaka dokumen tu,” ku iya nyemetak.
Nya alai ku iya, iya meransang ejensi perintah ti bekaul begunaka profail tu bela gawa nyaup bala ketuai raban bansa nembuka profail ari baruh menua dipegai sida.
Sama bisi datai Ketuai Raban Indu Indu Opis SUPP Datin Jenifer William, Tuai Kampung, Kampung Semban, Bujus Dian, Pemesai Kanan Bomba II, Opis Bomba enggau Penyah Penusah Sri Aman, Jilin Itar, Kunsilor Daniel Sawing, Kunsilor Waterkiller James Junit, Kaunsilor Gerunsin Nyelang, Chairman Pengatur Jimson Jium sereta urung 500 peranak ari genturung pendiau ke bukai.
Berebak enggau pengerami nya, Harden bekunsi agih belanja begilai enggau Menteri Kaunsil Kandang Menya Sarawak ke lalu nyadi Presiden SUPP, Datuk Profesor Dr. Sim Kui Hian penyampau RM 30,000 dikena ngemesaika agi balai komuniti nya.
Harden mega bisi ngemendarka agih belanja bela penyampau RM3,000 ngagai empat bengkah JKKK iya nya JKKK Kampung Semban, Kampung Sait, Kampung Bajong enggau Kampung Rejoi.