TROPI ulih nyadi penyanding penemu ngagai raban orang bumai bekebun

KOTA SAMARAHAN: Palan Pansik Tanah Lembut Sarawak (TROPI) ulih nyadi penyanding penemu ngagai atur tauka chara nyendiaka tanah ti manah ngagai orang bumai bekebun.

Direktor TROPI, Dr Lulie Melling madahka, kelapa sawit ke nyadi penyaup besai ngagai ekonomi nengeri mega ulih ditanam ba tanah lembut kelimpah ari mulung (sagu).

“Seharitu ( kemari), bisi 700,000 hektar tanah lembut di menua Sarawak udah mujur endur nanam kelapa sawit enggau mulung..

“Saup tauka pansik ari pengawa pemansik kami, asil Fresh Fruit Bunch (FFB) ba tanah lembut mega nambah dua kali lipat ngagai 25-30 tan sehektar,” ku iya.

Dr Lulie mansutka pekara nya dalam jaku pengelalu ba pengerami ‘Ramah Tamah’ Aidilfitri & Ngiling Bidai 2017 nyerumba Working Visit, Kepala Menteri Datuk Amar Abang Johari Tun Openg ngagai Sarawak Tropical Peat Research Institute (Tropi) ditu, kemari.

Nitihku iya, dalam timpuh lima taun ke udah, asil eksport kelapa sawit urung RM12 billion dalam taun 2016 iya nya ngelui ari asil kayu iya nya RM5 billion.

Kelapa sawit mega meri penguntung ngagai urung 90 peratus rega eksport betanam betupi, ku iya.

Bejaku baru iya madahka, chara bekebun ti manah dalam industri kelapa sawit ba pengawa ngatur tanah lembut ti meruan, kitai mega bisi asil penguntung bukai ari rampa menua.

“Ti pemadu beguna ditu, aku enggau gaga ati deka madahka pemujur pengawa madamka api ba tanah lembut, lalu nadai penyadi sebun asap di serata nengeri,” ku iya.

Dr. Lulie lebuh ke ngenang pasal infrastruktur TROPI, iy madahka palan nya bisi 50 iku saintis sereta 150 iku staf pemantu.

Naka ke diatu institut semina bisi 10 pemansik tetap lalu lima ari sida nya benung nyambung pelajar.

“Ditu aku deka madahka iya nya kami engka deka ulih mantaika ambis kurang lima kereta jurai taun tu lalu aku arap bendar taja pan agi baru, tu rikod tinggi ukai semina Sarawak aja tang Malaysia.

“Dikena terus maju sereta ngetanka orang bepengelandik ditu, kami amat ngarapka palan tu ulih diangkatka nyadi Statutory Body,” ku iya.

Kemari, Dr. Lulie dichirika nyadi Partner and Ambassador Hokkaido University Japan to Malaysia.

Sama bisi datai ngagai pengerami nya bini kepala menteri, Datin Amar Dato Juma’ani Tun Tuanku Bujang, Penyanding Penemu Pemansik Sains Sarawak Datuk Patinggi Tan Sri Alfred Jabu Numpang, Menteri Pelajar, Sains enggau Pemansik Teknologi Dato Sri Michael Manyin Jawong, Menteri Muda Pelajar enggau Pemansik Teknologi Dr Annuar Rapa’ee enggau ke bukai.

NGABAS PROJEK: Lo (tiga kiba) begulai enggau bala bukai ngabas palan projek endur masang lampu trafik di simpang Jalan Stakan ti dipelabaka deka berengkah dipejalaika bulan September tu.

NGEMEGAH: Dr. Lulie nerima dokumen nyadi Partner and Ambassador Hokkaido Universiti Japan to Malaysia ari (kiba) Professor Ryusuke Hatano ari Universiti Hakkaido, lalu dikemataka Abang Johari (dua kanan), kemari.