Perintah nengeri deka numbuhka Kaunsil Pansik
Tanggungpengawa kaunsil tu jemah deka ngatur semua pengawa pemansik ke dipejalaika di Sarawak
KOTA SAMARAHAN: Perintah nengeri deka numbuhka Kaunsil Pansik, ti deka ngatur semua pengawa pemansik ke dipejalaika di nengeri tu.
Kepala Menteri Datuk Amar Abang Johari Tun Openg madahka, nya berindik ari nengeri tu ngembuan pengaya pengeraja asal sereta ti pemadu manah di dunya.
Iya madahka semua pengeraja asal nya enda tau enda dijaga sereta dipansik rega ke tinggi ari reta tengkira kitai empu.
“Kebendar iya kitai deka numbuhka Kaunsil Pansik ba nengeri tu.
“Kaunsil tu deka mansik penemu ari semua gerempung pemansik ti deka meri rega tauka penguntung ngagai ekonomi kitai, laban agi mayuh pengaya kitai ba pengeraja asal ke bedau ditemu patut diserungkai ngena chara ti pemadu manah ari sukut pansik.
“Opis Menteri Pelajar, sains enggau Pansik Teknologi deka nyadi sebuah opis menteri ke bejalaika tanggungpengawa ngumpul semua penerang, sekeda penerang ke enda agi dilalai tang ulih dipekunsika,” ku iya.
Abang Johari mansutka pekara nya lebuh dirandau raban pengarang berita, pengudah iya ke ngulu pengerami ‘Ramah Tamah’ Aidilfitri & Ngiling Bidai 2017 sempena Working Visit Ketua Menteri Datuk Amar Abang Johari Tun Openg ke TROPI ditu, kemari.
Nitihku iya, penerang tauka asil nya deka disimpan dalam data besai sereta penerang beguna nya ulih dikena semua orang nyengkaum sektor peribit ba pengawa ngemansangka produk. “Dato Sri Michael Manyin Jawong enggau opis menteri iya mega deka bejalaika pengawa begulai enggau universiti. Dalam kes tu, begulai enggau univerisiti Jipun ti bejalaika pengawa pemansik ke chukup manah.
“Kitai begunaka universiti ti ngembuan reputasi ke manah gawa begulai enggau kitai ngambika bulih IP (Harta Intelek) renggat dunya.
“Pengawa pemansik nyadi pengerandang eknomi kitai. Nya kebuah aku deka meranakka puku lebih dalam pengawa pemansik laban ba pengujung iya, kitai bulih baru penguntung ari puku nya,” ku iya.
Kelimpah ari nya Manyin madahka keretas jurai kabinet opis menteri udah disediaka lebuh manggai bulan September lalu udah nya diberi ngagai kabinet sebedau dibantaika ba aum kunsil nengeri ke deka datai.
Kaunsil tu deka mansik penemu ari semua gerempung pemansik ti deka meri rega tauka penguntung ngagai ekonomi kitai, laban agi mayuh pengaya kitai ba pengeraja asal ke bedau ditemu patut diserungkai ngena chara ti pemadu manah ari sukut pansik. Datuk Amar Abang Johari Tun Openg Kepala Menteri Sarawak