Projek Jematan Btg Samarahan disadang laun tembu, ku Idris
KOTA SAMARAHAN: Pengawa nembuka projek Jematan Batang Samarahan disadang laun mimit ari perambu asal.
Tajapia,KabanKunsil Nengeri (ADUN) Muara Tuang Datuk Idris Buang pechaya penembu jematan nya ila deka meri pemaik ngagai peranak di Pelilih Kota Samarahan enggau Asajaya.
“Aku ngasai pengawa nembuka projek jematan tu enda begunaka timpuh panjai. Aku ngelalau semua kitai bela liat ati nganti penembu projek tu,” ku iya.
Iya mansutka jaku nya ngagai pemberita ba pengawa ngelalu pengabang Hari Raya ke diatur di Dewan Suarah Kota Samarahan, malam ensanus.
Ku iya nambah, enggau lurus aku madah enda nemu kebuah ke endar projek enda ulih ditembu nitihka perambu ketegal enda diberi penerang sentang pekara nya.
“Aku sedia betemu enggau kontrektor tauka ijinsi ke bekaul tang aku enggai ngemanjai kebuah projek laun tembu,” ku iya.
Ngenang kaul ke sama, iya ngarap projek ulih tembu nitihka perambu ketegal pengawa ngaga jematan nya sigi dianti rayat kenyau 2030 taun ke udah.
Kitai tetap nganti tajapan projek laun setaun tauka dua taun, tandu iya.
Idris netapka projek Jematan Batang Samarahan digaga ketegal pengeran bala ketuai ke dulu baka ke Kepala Menteri ke dulu iya nya Tun Pehin Sri Abdul Taib Mahmud, Niang Datuk Patinggi Tan Sri Adenan Satem sereta Kepala Menteri ke diatu Datuk Amar Abang Johari Tun Openg.
Tembu ila, Jematan Batang Samarahan ke ba pemanjai 774 meter deka nyambung Kota Samarahan enggau Asajaya.
Diatu servis feri diguna dikena meraka Batang Samarahan tauka Sungai Sabang.