Jematan Katibas udah tembu meruan sereta likun ditengah mensia mayuh
KAPIT: Sapit Menteri Pemansang Menua Pesisir enggau Kandang Menua Datuk Alexander Nanta Linggi bisi ngulu pengawa meri penerang sereta ngabas Jematan Katibas kena Hari Lima tu tadi.
Pengawa tu udah diatur Opis Kereja Raya (JKR) Bagi Menua Tengah lalu udah digulu Pemesai Pelilih Kapit Elvis Didit sereta Pemesai Pelilih Song Jackline August.
Menijar Bagi Menua JKR Bagi Menua Tengah Cassidy Morris udah meri penerang. Sama bisi datai Menijar Projek JKR Bagi Menua Tengah, Jawa Gara.
Pengudah tembu ninga penerang, Nanta disempulang bala pemesai perintah, konsultan enggau kunteriktor bejalai ngabas jematan, belakin jalai sereta mega garis ba sepemanjai jematan nya.
Ku Nanta, lebuhka dirandau pengarang berita, iya dikangau ngulu pengawa meri penerang sereta ngabas jema- tan begulai enggau bala bukai laban projek Jematan Katibas udah tembu kena 6 Julai taja hari bulan penembu iya ke bendar 14 Julai 2017.
Jematan sepemanjai 330 meter tu meraka Sungai Katibas. Pengudah nya, jematan tu deka berengkah dibuka ngagai mensia mayuh kemari, 8 Julai.
Kena Hari Lima, bala sida bisi bejalaika pengawa bukai baka ngaga garis ba tengah jalai laban sida meseti nembuka pengawa sebedau jematan tu dibuka ngagai mensia mayuh.
“Aku ngelalau mensia mayuh taja jematan tu udah ulih ditengah, tang nyema sida berundingka diri ulih ngelawa Kapit terus, nyangka enda ngemuntang nya.
“Bala kita ulih tang agi nengah jalai ti bedau tentu tembu di Sungai Emburu, kandang menua Sebatu, urung empat ngagai lima kilometer ari jematan ngulu Batang Rajang.
“Jalai tu endang agi lichau, repa sereta agi tebiang endar,” ku iya.
Tang ku iya, kesemua jalai napatka Sungai Yong agi dikumbai benung digaga. Kitai enda ulih madahka tu tebuka ngagai mensia mayuh taja ulih ditengah ngelawa Kapit.
“Nyema sida keran deka baka nya, pengelikun sida bepanggai ba diri empu. Bala sida meseti ingatka jalai tu benung digaga sereta bejejimat lebuhka di rantau jalai,” ku Nanta ngelalau.
“Tang ba jematan tu, jalai pengudah jematan likun diten- gah dataika kandang menua Emburu. Kami chukup ngemeratka mensia mayuh ti deka nengah jalai enggau jemata, nya kebuah kami ngemendarka sida. Taja pia, bala sida meseti meretika pekara pengelikun projek tu,” ku Nanta nerang.
Batang tuju pejalai sehari nya deka beratika penembu jematan. Nanta ngabas projek ngarika Opis Menteri Pemansang Menua Pesisir enggau Kandang Menua.
Nanta muji semua piak ti udah ngaul dalam pengawa nya, piak JKR ti udah matau iya sereta mega piak kunterik- tor sereta konsultan ti udah bejalaika pengawa enggau manah.
Jematan Katibas sepemanjai 330 meter, beungkus RM71.5 juta, meraka Sungai Katibas, jalai ti berengkah di Sungai Tekan ngelawa Sungai Emburu.