Harden bisi ngabas tiga projek RTP ungkup DUN Simanggang
SRI AMAN: Menteri Muda Pengelantang Komuniti, Datuk Francis Harden Hollis bisi bejalai ngabas sekeda projek ari baruh Projek Transformasyen Menua Pesisir (RTP) ungkup sitak Kunsil Nengeri (DUN) Simanggang semak ditu, pagi kemari.
Tiga projek tu iya nya ngaga Projek Ngaga Jematan Temiang Lama, Batu Lintang Undop, Jematan Sekula Primari (SK) Nanga Klassen, Sri Aman sereta Balai Mayuh Guna, SK Nanga Klassen Undop.
Harden lebuhka bejaku ngagai pengarang berita ngarapka pejalai tiga projek tu ila ulih meri pemaik ngagai peranak kelebih agi di kandang menua Temiang Undop Sri Aman seraya Projek Jematan enggau Balai Mayuh Guna SK Klassen tu deka meri pengelantang ngagai bala pengajar enggau nembiak sekula ti deka meraka Sungai Klassen sereta ngatur bemacham aktiviti renggat sekula.
“Projek Jematan Temiang Lama Batu Lintang Undop ngena belanja manggai RM750,000 seraya Jematan SK Nanga Klassen eng- gau Balai Mayuh Guna SK Nanga Klassen bela beungkus RM500,000 lalu diatu benung digaga,” ku iya.
Ku iya, tu sebagi ari pemansang dipejalai di kansang menua Undop lalu sekeda jematan ke bukai di Undop mega udah digaga sebedau tu.
“Kesemua projek dipejalaika tu ngena agih belanja RTP aku ungkup sitak Simanggang,” ku iya nerang silik.
Bela nyempulang iya bala pemesai ari Opis Kereja Raya ( JKR) Sri Aman, Kepala Pengajar SK Nanga Klassen, Alfred Kendim, Sapit Chairman Kaunsil Pelilih Sri Aman (MDSA), Kaunsilor Andar Suntai, Kaunsilor Daniel Sawing, Kaunsilor Gerunsin Nyelang sereta bala bukai.
Berebak enggau nya, Harden mega bisi ngabas kandang menua Tatah Susur begulai enggau JKR Sri Aman di Jematan SK Nanga Klassen sereta ngabas pemansang infrastruktur enggau pengawa ngemanahka kelas di SK Nanga Klassen.