Penusah pengidup ditapi Doris nerima perati ari DTTG Bintulu
SIBU: Semina ngandalka gaji bekuli enda lebih ari RM200 sebulan, juluk ati Doris Majing deka diau ba rumah ke manah agi engka tusah nyadi nyata.
Sebedau tu, iya ti nadai orang nyemilik diau kediri ba rumah ke digaga niang apai iya ba KM12 Jalai Bintulu-Miri.
Tang sepengudah rumah nya bela ditujah projek jalai besai Pan Borneo, Doris nadai daya deka nagang ari rumah pesaka nya direrak kelimpah ti semina nerima bayar pampas ke mimit dikena iya ngaga rumah baru.
Peranak rumah panjai ke besemak ti sinu meda datai ngelawa iya ngentak langkau baru alai iya diau.
Taja pan baka nya, laban nadai belanja mayuh langkau nya semina digaga ngena zink aja, enda meruan alai diau.
Doris mega dipadahka nadai kala nerima sebarang bantu pengidup ari opis ti bekaul kelimpah ari semina ngandalka bekuli bebasu ba kedai ke besemak enggau ngarapka sayur babas laku dijual.
Pemerat tating pengidup ke ditapi Doris tu mujur matak penyinu raban Dayak ThinkThank Group (DTTG) Bintulu.
Raban sida ti betuaika Agat Sagai beguai ngelawa Doris sepengudah nemu penusah ke ditapi nya kena 19 Februari tu tadi.
Sida maya nya mega besaup nyuaka pemeri nyengkaum barang pemakai ngagai Doris.
Kelimpah ari nya, sida besemaya deka nyaup Doris ngaga rumah baru.
“Kena 25 Februari, raban kami ditu besaup bepupu lalu mujur teulihka RM2,000 ti dikena bebelika ramu baka batu bata, semin, besi enggau ramu ke bukai.
“Nangkan ke nya, kena 17 April, kami besaup nyemin taba rumah baru Doris,” pia ku iya madah ngagai pengarang berita, kemari.
Kena 2 Julai tu tadi, raban sida belabuh ngaga dinding enggau nusun batu bata rumah nya.
Naka ke diatu, rumah nya empai tembu nambahka raban DTTG Bintulu semina ulih datai ngaga rumah nya maya ujung minggu aja.
Kelimpah ari nya, mensia mayuh ke bisi ati nyaup ngelempungka penusah tauka besaup ngaga rumah Doris tau betanya ngagai Agat nengah lumur 011-25115770.