Projek ngaga indu opis, balai mensia mayuh enggau gerija BEM Sibu udah berengkah

SIBU: Pelin ngaga projek ngaga indu opis, balai mensia mayuh enggau gerija Borneo Evangelical Mission ( BEM) pelilih Sibu ba Kilometer 25 Jalai Sibu- Salim udah berengkah.

Projek tu beungkus urung RM500,000 dipenyadika Kaban Parlimen Julau Datuk Joseph Salang Gandum ba sebengkah pengerami makai lemai ngiga belanja ngaga projek nya ba sebengkah hotel ditu, malam ensana.

Sama bela datai maya tu iya nya Kaban Parlimen Sibu Oscar Ling, Kaban Parlimen Lanang Alice Lau, Kaban Kunsil Nengeri ( ADUN) Bukit Assek Irene Chang enggau Presiden BEM Sarawak Bina Agung.

Salang ba jaku iya madah, projek ke deka digaga nya nerima sukung ari semua piak.

“Kitai temegah ati laban ulih nyaup ngaga rumah Tuhan.

“Kitai mega nyaup ngaga palan alai raban nembiak bela ngambi bagi ngaga pengawa ke menyana alai sida ulih nempa ulah positif ba diri empu,” pia ku iya madah.

Salang ti mega Penyanding Penemu Opis Kaunsil 1Malaysia Sarawak madah, iya nguji deka ngungkupka belanja nyaup nembuka projek nya ari piak iya.

Maya tu, iya ke bejaku ba mua pengari ari parti penyakal, Parti Tindakan Demokratik ( DAP) ti bela datai maya nya madahka jalai pengarap besai agi reti ari penemu politik.

“Kitai nyangka betalatka isu- isu ti bisi nyadi ngena penemu politik ke bebida enggau pangan diri tang kitai begempung dalam Yesus Kristus, besaup ngaga projek tu,” ku iya sambil madah ADUN Belaga Liwan Lagang mega bisi meri saup RM10,000 enggau ADUN Murum Keneddy Chuk Pai bela besemaya meri RM5,000 ngaga projek nya.

Bina dulu agi ari tu meri jaku terima kasih ngagai Tuai Rumah Simon Ason laban udah meri tanah alai ngaga taba projek nya.

Ku iya, pemanah Simon nya mandangka Simon seiku ketuai ti manah sereta ngemeratka pengidup rayat.

Simon maya betemu sepengudah pengerami nya madahka gerija nya ila chukup alai 3,000 iku mensia mayuh.