Pengerami Ngiling Bidai 2017 diatur Palan Servis Kapit digulu pupu bansa
KAPIT: Kaban Kunsil Nengeri (ADUN) Pelagus Wilson Nyabong Ijang muji Palan Servis Kapit ti mujur ngatur Pengerami Ngiling Bidai 2017 ba palan nya seraya ngangauka semua bala ketuai opis perintah, ketuai raban bansa sereta mensia mayuh datai ngulu pengerami nya.
“Nyadi kaban politik, aku endang muji pengawa ti deka diatur palan tu ti nesau semua orang nadai ngira bansa, baka ke malam tu bisi 200 iku datai, ukai semina bansa Dayak aja, tang mega bansa China enggau Melayu.
“Tu manah endar dikena ngerapitka agi kaul sereta mega ngelakuka palan tu ti udah nyadi endur ngatur aktiviti,” ku Nyabong.
“Aku dekaka mayuh agi aktiviti, sekalika mit tauka besai diatur di palan sivik tu. Ditu, kitai bisi perengka guna balai enggau bilik gempuru endur baum, ngatur workshop sereta ke bukai.
“Perintah nirika palan tu ungkup peranak menua tu lalu aku ngarapka opis perintah enggau bala komu- niti ngena iya memanah,” ku Nyabong nambah rambau bejadika Pengerami Ngiling Bidai Balai Suarah Kapit kena lemai Hari Empat tu tadi.
“Aku chukup temegah ati, taja Kaunsilor Bakat Gira baru enam bulan dipadu nyadi Menijar Palan Sivik Kapit, tang iya udah ngayanka penau diri ngatur penngerami. Baka ti udah dipeda kitai malam tu bisi dua ratus iku temuai.
“Aku gaga endar meda bala ke datai ari pupu bansa, ukai semina Dayak, tang bisi bala menyadi bansa China enggau Melayu berami enggau kitai,” ku iya nampung.
Pemesai Pelilih Bukit Mabong Douglas Pungga, Pemesai Pengereja Pengawa Opis Residen Kapit Wee Tat Ming, Pemesai Bomba eng- gau Penyah Penusah Kapit Irwandy Tugor, Kaunsilor Bakat Gira, Sapit Ketuai Kunsil Opis Pelilih Menua Kapit Lawrence Listen sereta Temenggong Wilfred Billy Panyau sekeda ari bala temuai ke bisi datai.
Sekeda aktiviti ti bisi diatur baka miring, karaoke, chabut tikit benasit sereta ke bukai.