Tuju kami ke London ngiga penerang ti betul pasal MA63, ku Sharifah Hasidah

KUCHING: Raban ti deka dianjung ke London betuaika Menteri Muda ba Opis Kepala Menteri ( Undang- undang, Kaul Sarawak enggau Perintah Besai enggau Matau Projek), Sharifah Hasidah Sayeed Aman Ghazali betuju ngiga penerang ti betul pasal MA1963, kena 16 Julai tu.

Sharifah Hasidah lebuh dirandau maya pengerami Nerima Pengabang Raya Aidilfitri Nancy ba DUN Lama ditu, kemari madahka raban ke nyereta iya ke London, datai ari mayuh bidang pengelandik.

“Kami ke London laban ketegal pengawa besai iya nya kami deka ngiga utai ke amat tauka nyengala, ngaga pansik, lalu beratika pekara ke amat dalam MA1963.

“Kami deka ngiga pekara ke amat, lalu nusun dokumen tu enggau manah, laban ba luar din nengah internet, Facebook, mayuh endar pekara ke di rintai orang dia, enda ditemu kitai pengamat.

“Nya alai, kami deka pekara tu nyengala, kami deka beratika utai ke amat,” ku iya nandu madahka Kepala Menteri Datuk Amar Abang Johari Tun Openg sigi deka meda Sarawak bisi tim diri empu mutarka pekara tu.

Ba tanya pengarang berita ti madahka Presiden STAR Sarawak, Lina Soo ke deka nyuaka bup sereta dokumen pasal MA1963 ke bisi 1,000 lebih limpir, Sharifah Hasidah madah iya setuju enti sema Lina deka meri bup sereta dokumen nya ngagai iya.

“Iya (Lina) tau meri ngagai aku pasal MA1963, lalu baka nya mega orang bukai, nadai penanggul nya deh,” ku iya.

Ba jaku bantah penyakal madahka raban sida ke London semina masau duit aja, ku Sharifah Hasidah:

“Nadai, munyi nya, laban pekara tu pengawa ke deka dikereja kami, ngiga pengamat sereta dianjung Perintah Sarawak.

“Tuju kami, kami enggai nyangka utai sengapa, ngiga pemendar sereta tu atur ari perintah, ukai bepelasarka pekara ke dibacha ari Facebook, internet tauka utai bukai…Tu amat ngiga utai ke betul,” ku iya, lalu nandu sida deka mansik semua pekara tu nengah Arkib, palan bacha sereta ari pemisi bukai maya di London.