Pemanah kaul di Sarawak endang patut dichunto
KUCHING: Kaul entara pupu bansa sereta pengarap di nengeri Sarawak nyadi chunto ke pengabis manah, sereta patut seruran dikemeranka semua rayat Malaysia.
Ba pengeremai Nerima Pengabang Hari Raya Aidilfitri Menteri ba Opis Menteri Besai, Dato Sri Nancy Shukri kemari, bisi digulu urung 10,000 iku pengabang ke datai ari sitak Parlimen iya, ari Sadong Jaya, Simunjan, Asajaya nyengkaum ari Kuching sereta mengeri bukai.
Timbal ari rayat pupu bansa ke ukai bepengarap Islam lebuh ngelawa pengerami nya lebuh betemu enggau Tuai Pemegai Menua (TYT) Sarawak Tun Pehin Sri Abdul Taib Mahmud enggau bini iya, Toh Puan Datuk Patinggi Ragad Kurdi Taib chukup manah.
Mensia mayuh tauka bala pengabang ke bisi dati mega bepeluang berandau enggau iya, madah menua Sarawak seruran dipuji laban ke seruran beserakup sereta nyadi chunto ke pengabis manah di Malaysia.
“Kitai enda tau enda ngangkatka pekara ke nyata ba mua mata kitai empu, laban mayuh orang ti ngulu pengerami kitai sehari tu, datai ari mayuh pupu bansa sereta pengarap.
“Kaul ari mayuh pupu bansa seta pengarap di Sarawak datai ari tuai pemesai kitai sebedau tu, lalu disambung enggau tuai pemesai baka ke diatu,” ku Nancy.
Iya madah munyi nya ngagai pemberita ba pengerami ke diatur ba Begunan Kunsil Nengeri (DUN) Lama ke bela digulu urung 10,000 iku pengabang.
Sama bisi datai ex-TYT Tun Muhammad Salahuddin enggau bini iya Toh Puan Norkiah, Kepala Menteri Datuk Amar Abang Johari Tun Openg enggau bini iya, Datin Amar Dato Juma’ani Tunku Bujang, Menteri Kereja Raya Dato Sri Fadillah Yusuf, Menteri Orang Indu, Ruang Bilik enggau Pemansang Komuniti Dato Sri Rohani Abdul Karim, Menteri Opis Kandang Menua ti mega Menteri Pengawa Berumah Datuk Prof Dr. Sim Kui Hian sereta sekeda pemesai bukai.
Lalu ulah bansa tu ku iya, lalu disambung ex-Kepala Menteri sebedau tu (diturunka ari Taib) niang Datuk Patinggi Tan Sri Adenan Satem lalu di sambung Kepala Menteri Datuk Amar Abang Johari Tun Openg, seiti pengawa ( betukar kuasa) ke digaga enggau mujur sereta dipuji.
“(Pengawa Betukar kuasa) digaga enggau mujur meri pengelantangka ati semua kitai, lalu adat bansa tu di Sarawak enda tau enda terus dikemeran, kitai patut terus beserakup enggau pangan diri,” ku iya.