Dua jematan runtuh ba Lusong Laku meseti diputarka lengkas
KUCHING: Urung 1,000 iku, tebal agi bansa Penan di Lusong Laku diatu tepekul ari dunya luar pengudah dua jematan di sepemanjai 30 km jalai batang lama ngelawa kandang menua nya runtuh.
Ketuai komuniti Penan Penghulu Luhat Ayup madah dua jematan nya runtuh apin lama ke udah ngujungka sida balat irau betatika pekara ba pengidup enggau pengerai diri.
“Kami idup jauh endar di menua ulu Sarawak. Dua jematan ke runtuh tu ngujungka kami diatu endang nadai agi jalai bukai lalu aku chukup irauka nasit komuniti aku.
“Nya alai kami ngapil bantu jampat ngagai perintah laban kami endang begunaka jalai tu,” ku Luhat madah ngagai thesundaypost ensanus.
Nangkan nya, iya mega ngapil ngagai perintah bantu ngemanahka dua jematan sereta ngemanahka jalai batang enggau jampat.
“Kesemua jalai tu iya nya jalai batang ke dulu suba. Tang kenyau ari kereja ba- tang udah dikurang kandang beberapa taunt u, kompeni batang udah ngetuka pengawa ngintu jalai,” ku iya.
Ketuai komuniti Kayan Pemanca Umek Jeno madahka bala ketuai komuniti enggau pengari rayat di kandang menua nya bisi berandau kena malam Hari Lima lalu udah ngarang surat peminta ngagai Menteri Pemansang Infrastruktur enggau Perengka Pengangkut Tan Sri Datuk Amar Dr James Jemut Masing ungkup bantu jampat.
“Dalam surat nya, kami minta RM10 juta dikena ngemanahka jalai, ngaga jematan dikena nukar jematan batang ke diatu lalu ngemanahka sistem entali ai, ngambika ulih ngemuntangka jalai penyampung peranak ke diau di Lusong Laku,” ku Umek.
Ku iya, kandang ke diatu bisi sekula, klinik pengerai enggau stesyen betanam betupi di Lusong Laku lalu dua jematan runtuh tu mega mangka pengidup bala orang ti gawa perintah dia.
“Sebedau Hari Raya Aid- ilfitri, bala pengajar enggau orang gawa perintah dia udah beripai gawa tang jematan tu enda tan lama,” ku iya.
Ku Umek, bala ketuai komuniti menua nya udah digerah pengari rayat sida, Kaban Kunsil Nengeri (ADUN) Murum Kennedy Chukpai Ugon enggau Kaban Parlimen (MP) Ulu Baram Datuk Wislon Ugak Kumbong ngambika mantu kompeni batang ti agi bejalaika pengawa sida ngemanahka jematan dikena mutarka enda lama.
“Tang pemutar timpuh panjai meseti dipejalai nentuka peranak nyengkaum orang gawa perintah ti gawa di menua nya bisi sambung jalai ti menyana agi,” ku Umek.
Ba lansa ke bukai, lebuhka dirandau, Masing madah, taja iya bedau nerima surat peminta ari pengari rayat di menua nya, tang iya deka nganjung bala iya bejalai ngabas pekara ti nyadi sebedau iya ulih mansutka sebarang penerang pasal pekara nya.