Wong: Identiti bansa diri meseti seruran ditan
Kitai patut berasai temegah enggau identiti diri empu taja begulai enggau bansa bukai
SIBU: Identiti bansa diri meseti nyadi pekara keterubah ditanka maya ke diau begulai enggau pupu raban bansa ke enda sebaka bansa enggau jalai pengarap.
Menteri Dagang Entarabansa enggau E-Dagang ti mega Menteri Wang II Dato Sri Wong Soon Koh madah, kitai patut berasai temegah enggau identiti diri empu taja begulai enggau bansa bukai.
“Tang berebak enggau nya, maya ke begulai enggau orang bukai baka ba genturung pendiau, kitai tau bekunsika ulah rinduka pangan diri lalu nempa kaul diau enggau orang sepiak-sepiak,” pia ku iya madah.
Iya mantaika jaku nya maya bejadi pengerami Sarawak Celebrate enggau Pengerami Ngiling Bidai ke diatur Gerempung Dayak Sarawak (SDNU) Sibu begulai enggau Opis Pelilih Sibu ba sebengkah hotel ditu, malam kilah ensana.
Sama bela datai maya tu iya
Tang berebak enggau nya, maya ke begulai enggau orang bukai baka ba genturung pendiau, kitai tau bekunsika ulah rinduka pangan diri lalu nempa kaul diau enggau orang sepiak-sepiak. Dato Sri Wong Soon Koh Menteri Dagang Entarabansa enggau E-Dagang
nya Kaban Kunsil Nengeri (ADUN) Datuk Tiong Thai King, Chairman SDNU Sibu Chambai Lindong, pemangku Pemesai Opis Pelilih Sibu Zulkarnain Ismail, Temenggung Stanley Geramon enggau Pemancha James Semilan sereta bala bukai.
Wong ti mega Kaban Kunsil Nengeri (ADUN) Bawang Assan maya tu muji pengerami ke diatur lemai nya.
Ku iya, pengerami baka nya tau bendar ngempuruka pupu raban bansa sereta nempa tuju ke besai reti ba pengidup begulai enggau pangan diri.
“Seiti chunto ke manah iya nya baka pengerami ke diatur tu laban ditu kitai meda macham pupu raban bansa begulai enggau pangan diri.
“Penatai kitai ba pengerami tu mandangka kitai ulih ngemanahka agi kaul begulai enggau pangan diri,” ku iya madah baru.
Wong mega madah, nengeri Sarawak sebengkah nengeri ti ngintu hari besai tiap iti etnik enggau chara begulai.
“Aku enggau temegah ati madahka Sarawak nadai bepenanggul ngintu hari besai baikka baka Gawai Dayak, Hari Raya, Taun Baru China tauka Krismas begulai enggau pangan diri ti datai ari bansa enggau jalai pengarap ti bebida.
“Tu ulah ke manah ti bisi dikembuan kitai rayat Sarawak seraya ke nyadi seiti ari chara ke pemadu engkeman nyintalka agi kaul, nyemetak agi nemu nama bagi main enggau pengarap pangan diri,” pia ku iya madah.
Dulu agi ari tu, Zulkarnain ba jaku iya madahka Sarawak Celebrate keterubah iya belabuh diatur taun tu ke dipenyadi ninting maya hari besai.
“Tuju iya dikena kitai ng- etan sereta nyungkakka agi pengelikun pengidup pupu raban bansa lebih agi baka di Sibu ditu,” ku iya madah.
Mensia mayuh ke bisi datai maya tu diperindang enggau macham bengkah program panggau nyengkaum baka mantaika main asal Ngajat, Bekuntau, Sape enggau ngerebahka ranyai.
Ba pengerami tu, Wong bela nyuaka chek RM10,000 ti nyadika pemeri iya ngagai SDNU Sibu ti diarika Chambai.