Raban nembiak patut ngemeratka tikas pelajar ke pemaik nengeri tu
MIRI: Raban nembiak dilalau terus ngemeratka tikas pelajar dikena nentuka sida ulih nyaup nyungkak pemansang ba nengeri tu.
Sapit Kepala Menteri Datuk Amar Awang Tengah Ali Hasan ( gambar), madahka dunya majak berubah nitihka arus pemansang kemaya hari ngujungka rebak baru patut nambahka penemu enggau pengelandik ngambika enda tinggal.
“Sida ti bisi pelajar tinggi lalu udah teulihka kereja di sektor perintah tauka peribit patut gawa bebendar ngambika bela ulih nyaup ngangkatka pemansang nengeri Sarawak.
“Anang enda ingatka sida ti bejalaika dagang enggau pengawa dagang patut bebendar ba pengawa makit enggau ngelakuka produk sida ngena teknik makit pemadu manah belalauka penemu pelajar ti diiri di palan pelajar suba,” ku iya dalam jaku pengelalu rambau Pengerami ‘Ramah Tamah’ Aidilfitri Serakup Anak Jati Lawas Miri di Kompleks Islam Sarawak, kemari.
Ku Awang Tengah nambah, inisiatif Kepala Menteri Datuk Amar Abang Johari Tun Openg ba pengawa ngenegapka ekonomi menua tu nengah ekonomi digital ulih mai pedagang nyingkang jauh ba pengawa makit produk sida.
“Nya kebuah aku dekaka rebak baru bisi pelajar tinggi ngambi ulih meretika konsep ke bendar ekonomi digital sereta chara ti betul ba pejalai pengawa iya ila,” ku iya.
Ku iya, komuniti Lawas ti gawa di Miri mega patut ngaul diri enggau komuniti di menua nya.
“Tu beguna endar ngambika kitai ulih nerenakka ulah meretika pangan diri sereta betulung enggau per- anak di menua nya pulaika pengelantang ba kaul.
“Kita mega ditangkan bebasa sereta meri sukung ngagai bala ketuai menua tu nentuka semua pekara pemansang ulih dipejalai lalu penanggul ulih diputar nitihka pematut.
Berebak enggau nya, Awang Tengah mega ngemendarka agih belanja penyampau RM40,000 ngagai serakup nya dikena bejalaika aktiviti enggau program ungkup komuniti Lawas di Miri.
Sama bisi datai, Menteri Muda Orang Indu, Ruang Bilik enggau Pemansang Anak Mit Rosey Yunus, Chairman Serakup Anak Jati Lawas di Miri Alias Mail, ADUN Kaban Kunsil Nengeri (ADUN) Senadin Datuk Lee Kim Shin, ADUN Piasau Datuk Sebastian Ting, ADUN Lambir Ripin Lamat enggau Residen Miri Sherrina Husaini.