RFF benung diatur nyentuk 16 Julai

KUCHING: Rainforest Fringe Festival (RFF) keterubah ti mandangka seni, gambar, pemakai sereta muzik Borneo dilanchar di Old Court House ditu, kilah ensana.

Pengawa nya dikemujur Menteri Dagang Temuai, Nembiak, Seni, Main Asal enggau Lumba Datuk Abdul Karim Rahman Hamzah.

RFF ke diatur pengelama 10 hari berunggu berengkah 7 nyentuk ngagai 16 Julai 2017 nyadi sebengkah festival nyempulang Rainforest World Muzik Festival (RWMF) 2017.

“RFF deka nambah pengerami dalam kandang mengeri Kuching kelimpah RWMF ke diatur di Santubong.

“Hotel, restoran tauka palan pemakai sereta kompeni penyendia pengangkut deka teulihka penguntung ari dua pengerami tu,” ku Abdul Karim.

Iya nambah RWMF taun tu deka lebih manah ari ke udah ketegal ti disempulang enggau RFF ti mandangka mayuh bengkah pengawa.

Ku Karim, tu mih maya mengeri Kuching bela ngasaika pemaik asil pengerami RWMF ke diatur di Santubong ketegal mayuh mega temuai diau ba hotel ngelingi Kuching.

Ngenang kaul ke sama iya madah RFF deka diintu ninting taun taun nyempulang RWMF berengkah taun tu.

“Dulu agi ari tu iya nya maya kitai ngepunka RWMF semina 300 iku aja orang ke datai beperindang, tang diatu penyampau temuai udah manggai 18,000 iku,” ku iya.

RWMF deka diatur berengkah 14 nyentuk ngagai 16 Julai 2017.

Bela datai Menteri Muda Nembiak enggau Lumba Snowdan Lawan. Menteri Muda Seni, Dagang Temuai enggau Main Asal Datuk Lee khim Shin enggau Sekretari Mendam Opis Dagang Temuai Datu Ik Pahon.