Ulah nulak penemu ektremis ulih nyadi kunchi pengelantang menua
SKRANG: Rayat dilalau ngambika nulak penemu ekstremis lalu patut ngemeratka penyerakup laban nya kunchi penegap pengelantang pupu bansa di nengeri tu.
Kaban Kunsil Nengeri (ADUN) Engkilili Dr Johnical Rayong Ngipa madah, ulah nulak penemu ekstrem kelebih agi ba jalai pengarap nyadi kunchi pengelantang ba sekeda nengeri enggau menua.
“Kitai meda mayuh menua bukai kelimpah ari Timur tengah charut ketegal kelalu angkunka bansa, adat enggau jalai pengarap, taja pengarap enda kala ngasuh mensia charut, tang diau likun sereta bebasaka pangan diri,” ku iya.
Iya mansutka jaku nya lebuhka bejaku ba pengerami Ngiling Bidai 2017 diatur Kaban Komiti Pemansang enggau Pengelikun (Besai) Skim Skrang di Balai Dr Johnical Rayong Ngipa ditu, kemari.
Sama bisi datai Kaban Parlimen (MP) Lubuk Antu, Datuk William Nyalau Badak.
Ku iya, nengeri diuan mayuh pupu bansa baka Sarawak enda patut malut diri enggau penyarut bansa laban nengeri tu bisi lebih 28 bansa, tentu iya ngembuan bemacham budaya, pengarap sereta jaku sida empu.
“Nya alai, taja bansa minoriti tang hak enggau peminta sida patut diperati nentuka kitai ulih idup likun sereta begunaka pangan diri,” ku iya.
Tandu Ketuai Nembiak Parti Rakyat Bersatu (UPP), sebarang aktiviti ti ulih ngenegapka tanggam kaul enggau penyerakup patut diberi perati sereta disukung.
“Sekeda ari iya nengah pengawa ngintu hari besai baka Gawai Dayak, Krismas, Hari Raya, Tahun Baru China enggau ke bukai patut diintu semua bansa enggau nengah pengerami nerima pengabang.
“Tu dientudi enggau pen- gawa nutup Gawai, Pengerami Ngiling Bidai, kelai Gawai tembu, baka ti dirami kitai sehari tu lalu aku temegah ati laban bisi nerima pengabang ari bansa China enggau Melayu,” ku iya.
Ku iya, pengawa ke bansa tu patut dikemeran laban nyadi pelasar pemadu manah negutka kaul pupu bansa di Sarawak.
“Nengah iya, kitai ulih bekunsika pemakai asal ukai semina peranak di Skim Skrang enggau komuniti besemak DUN tu aja, tang mega bansa China enggau Melayu ke bisi datai,” ku iya seraya nambah Sarawak nengeri ti nyelai sereta ngemeranka konsep 1Malaysia ke bendar laban bisi ruang bilik penakan.
Ngelansa pasal pelajar, Dr Rayong ngansak semua apai indai nyediaka peluang pelajar ti menyana ngagai bala anak.
“Baka ti suah disebut aku semina nengah pelajar ulih ngubah ukai semina pengidup diri enggau diri sebilik dudi hari tang mega mansang tauka enda nengeri enggau menua bepanggai ba rebak dudi hari.
“Nya alai, anang sesekali nejuka pelajar bala anak laban nadai beka penemu ti chukup ngujungka pengidup rebak dudi petang lalu enda ulih besemekih enggau bala bakih ari bansa ke bukai,” ku iya.
Ku iya, rayat di sitak Engkilili kelebih agi di Skim Skrang enda patut bisi penangi laban nyadi ADUN dia, iya deka naka ulih ngemai mayuh pemansang laban nya hak rayat.
“Diatu kitai ulih meda pengawa ngemanahka jalai di Skim Skrang ti dipejalai enggau belanja manggai RM2 juta,” ku iya.
Bela bisi bejaku Kaban Parlimen Lubok Antu Datuk William Nyalau Badak ti madahka diri besemaya deka mai mayuh agi pemansang ungkup Parlimen Lubok Antu ti mungkur DUN Engkilili enggau Batang Ai.
Berindik ari nya, iya ngemai rayat kelebih agi bala pengundi anang tepawah runding enggau jaku sekeda piak ti madahka iya badu agi dipilih ngetanka penuduk nya maya PRU14 tu ila.
“Enti sema aku amat enda dipilih, orang ti patut nemu lalu keterubah dipadah iya nya aku empu lalu ukai orang bukai, tu nyata semina berita bula,” ku iya.
“Tambah mega, agi mayuh perambu aku begulai enggau kededua ADUN, benung lalu deka dipejalai, lalu aku dekaka iya tembu sebedau aku nyerahka (penuduk) Lubok Antu ngagai penganti aku ila,” ku iya seraya nambah semina peranak asal menua nya dikemendar ngarika pengundi ba kededua penuduk tu.
“Aku andal Skim Skrang terus nyadi kubu kuat Barisan Nasional (BN) sereta enda nejuka pengundi ba sitak bukai ari baruh Parlimen Lubok Antu,” ku iya.
Bela diatur pengawa nyuaka insentif ngagai 124 iku nembiak sekula ari primari 1 ngagai 6 di SK Skim Skrang, Dr Rayong mega ngemendarka geran Projek Mit Pemansang Menua Pesisir (MRP) ngagai JKKK Besai Skim Skrang penyampau RM20,000.
Sama bisi datai Chairman Pengatur TR Johnson Damu, kaunsilor tr Bangkong Maweng, Pemesai JASA Sri Aman Geofrey Maba, pemesai ASA Edwin Anchih, penghulu, bala kapitan, kaunsilor, tuai-tuai rumah, pengari komponen BN sereta komuniti diau besemak DUN Engkilili enggau Batang Ai.