Anang ngelengka adat, pengawa asal aki ini
MARUDI: Menteri Muda Kaunsil Kandang Menua, Datu Dr.Penguang Manggil minta peranak ditu anang ngelengka adat enggau pengawa asal aki ini sida kelimpah ngetanka penyerakup enggau pangan diri ba rumah panjai, ambika chunto, sekeda rumah panjai udah pambar ketegal nadai penyerakup.
Datu Dr. Penguang mega minta peranak ditu gawa begulai enggau perintah ke bisi diatu lalu anang ngira sapa bagi ADUN sida laban perintah deka ngagihka belanja ungkup sida tang berenggat.
Nya alai, genap iku peranak rumah panjai patut besabar laban agih belanja tu bisi tatak lalu iya deka diberi berenggat.
Datu Dr. Penguang ke mega Kaban Kunsil Nengeri (ADUN) Marudi mansutka pekara tu rambau bejaku Ngelancharka Pengawa Nasih Tanah taba rumah panjai baru di Rumah Tr.Jilan Chaong, Sg Gerunggang, Ulu Sebatu di Tinjar, pagi kemari.
Ku Penguang nambah, perintah diatu agi ngelala ni bagi sekula ti udah luya ngambika dikemanah. Kelimpah ari nya mega, bisi tiga sekula primatri udah dikelala deka ngena Jaku English nyadika batang jaku ngajar ninting hari tauka English Medium.
Tiga buah sekula pemungkal Projek English Medium tu iya nya Sekula Primari (SK) Peking (Tinjar), SK Pengarah Enterie (Ulu Teru) enggau SK Sg Entulang (Bakong).
“Nya alai, kitai endang chukup temegah ati enggau bansa diri laban tu seiti ari pengelikun enggau pengelantang bansa sereta pengaya ba pemansut ekonomi.”
“Kitai meseti ngangkatka diri empu ari sukut ekonomi enggau pengawa betanam betupi.
“Nya alai, bala ketuai komuniti baka pemancha enggau penghulu dipinta ngelala sapa bagi sida ke bisi ati dalam projek betanam betupi tauka dagang jelu tupi, ambika chunto, kebun nyiur lalu perintah deka meri sida latih enggau bantu.
Peranak mega diansak meri sukung nadai bebagi ngagai sebarang chalun Barisan Nasional (BN) ungkup sitak Baram maya Pengawa Bepilih Besai (PRU) ila.
Menteri Muda nya mega minta peranaka anang bebelika lumur ngena chara belalai laban mayuh dijual di rumah panjai diatu. Penanggul dadah ti meseti diperati sereta ngintu ruang bilik ari gian dadah ti kala nyadi di Pasar Long Lapok.
Berenak enggau pengawa nya, Datu Dr.Penguang bisi ngemendarka geran Projek Mit Pemansang Menua Pesisir (MRP) penyampau RM20,000 ngagai Komiti Pemansang Enggau Pengelikun Genturung Pendiau (JKKK) Rumah Jilan, RM5,000 ngagai Biro Indu Rh Jilan sereta RM5,000 ngagai Gerija Sidang Injil Borneo (BEM) Sg Sebatu.
Sama bisi datai Sekretari Politik Kepala Menteri Alexander Asing, bini Penguang, Datin Monica Ukong Jaya, Pemangku Pemesai Pelilih Beluru Belayong Pok, Pemancha Enggah Nuga enggau Penghulu Nyadang Rengkang.
Rambau pengawa nya, Tuai Rumah Jilan Chaong bisi nyuaka urung 54 pom peminta SPDP ngagai Datu Dr.Penguang Manggil.