Palan pansik jaku Iban patut ditumbuh
Tu beguna amat nyadi pelasar endur ngerembai sereta ngenegapka jaku Iban
MIRI: Sebuah palan pansik jaku Iban patut ditumbuh ba nengeri tu, ngambi nyadi pelasar endur ngerembai sereta ngenegapka jaku nya.
Pia mega penumbuh palan pansik tauka sebengkah yayasan ungkup jaku Iban, endang batang pekara diperambu sereta dipinta raban pesereta Konferens Entarabansa Jaku Iban enggau Etnografi (ICILE) 2017 ke diatur ba Palan Pematih Pengajar (IPG) Kampus Sarawak ditu.
Prof Madya Dr. Bromeley Philip ari Universiti Institut Teknologi Malaysia (UiTM) Sarawak, madah seagi bedau bisi palan baka nya dikena mansik enggau ngerembaika jaku Iban, nyadi pengawa ngemansang enggau ngangkatka jaku Iban nyadi jaku akademik tentu pedis.
Iya madah, mayuh forum tauka randau besai diatur alai bejuraika pasal jaku Iban sereta kuing tuju iya nadai meri asil, enti nadai palan ke baka nya ditumbuh dikena ngumpul semua asil pansik, langgur penemu enggau ke bukai.
“Nyema kitai bisi seiti palan ke nyengala, nyadi kitai ulih numbuhka komiti khas bejalaika pansik pemansang jaku Iban sereta komiti ke patut nyaga sereta ngerembaika jaku Iban ngagai tikas pemadu tinggi,” ku iya.
“Kelimpah nya, kitai patut nemu dibanding enggau jaku bukai baka jaku Melayu ke endang udah lama maju sereta ngerembai, jaku Iban agi jauh tinggal ba belakang lalu kitai ngembuan mayuh penimpang ba jaku ke dikena, ngujungka kitai patut ngaga pansik, sekalika kitai minjau tauka nempa jaku baru.
“Nyema kitai bisi palan khas sereta komiti khas, dia kitai ulih mantaika semua jaku baru, ngambi iya ulih dichelak ke guna kitai,” ku terang iya.
Nengah nya, ku iya nyadi jaku Iban ulih berurun nitihka standard ukai semina ba bidang nulis, nyelah, tang mega pansik ba semua renggat.
Dr Bromeley madah munyi nya ba sebengkah licha ke diberi topik ‘ Trajektori Dalam Pembangunan Bahasa Iban di Sarawak’, nyerumba ICILE kemari.
Iya seiku ari pengelicha ke dikangau khas mantaika keretas pansik pasal pemansang jaku Iban ke diatur pengelama dua hari belabuh 7 ngagai 8 Julai tu tadi.
Enam pengelicha bukai ke bela mantaika topik manah iya nya Prof. Madya Dr Chemaline Osup ari Universiti Pendidikan Sultan Idris, Tanjong Malim, Perak (Pemansang Jaku Iban); Prof. Madya Dr Neilson Ilan Mersat ari Universiti Malaysia Sarawak (UNIMAS), Kuching (Nanka Adat Asal); Direktor Pansik Yayasan Tun Jugah, Dr Robert Menua Salleh (Adat Ngulit enggau Tebalu Iban); Dr Nelson Tandang Edwin ari IPG Kampus Sarawak (Penempa Jaku Iban) sereta Padang Luna ari Opis Pelajar Pelilih Subis (Jaku Basa Iban) enggau seiku pengelicha Entarabansa ari Universiti Brunei Darussalam, Dr Yabit Alas mantaika topik ‘Bahasa Etnik Bisaya ba Limbang’.
Udah nya, ba pengawa betanya saut begulai enggau Dr Bromeley, aum nya bisi dipadahka urung 18,471 iku nembiak Iban ngambi subjek Jaku Iban ba sekula sekondari ba selampur nengeri Sarawak, tang semina 266 iku aja pengajar ke ngajar subjek Jaku Iban, nyengkaum pengajar ukai Iban.
Udah nya ba renggat sekula primari, bisi 69,866 iku nembiak belajar subjek Jaku Iban ba 694 buah sekula primari serata Sarawak, tang semina 2,757 iku pengajar ke ngajar Jaku Iban.
Penyampau nya dipeda chukup enda setipak mandangka pengajar kelalu mimit ngajar subjek Jaku Iban, nyadi pekara tu patut diputar kelimpah pengajar ke ngajar subjek tu patut liat ati ngangkat sereta ngerembaika jaku Iban nyadi jaku akademik.
Berebak enggau nya, pengawa nutup konferens nya dipenyadika Kaban Parlimen Sibuti, Ahmad Lai Bujang sereta digulu Direktor IPG Kampus Sarawak, Jamiran Salam sereta chairman pengatur, Pemancha Wilson Siang Lim.
Nyema kitai bisi seiti palan ke nyengala, nyadi kitai ulih numbuhka komiti khas bejalaika pansik pemansang jaku Iban sereta komiti ke patut nyaga sereta ngerembaika jaku Iban ngagai tikas pemadu tinggi. Prof Madya Dr. Bromeley Philip Lecture UiTM Sarawak