Rayat patut terus nyukung BN dikena ngemujur semua projek pemansang

PANTU: Rayat seruran dipinta meri sukung nadai bebagi ngagai perintah dipegai Barisan Nasional (BN) dikena ngemuntangka pejalai projek pemansang di nengeri tu.

Sapit Menteri Dalam Menua, Datuk Masir Kujat nerangka semua serak komuniti patut terus meri sukung ngagai ketuai perintah BN ngambika ngemansang sereta seruran bejalaika projek pemansang.

“Perintah endang begunaka sukung tegap semua kita laban rayat ti enda beserakup sereta nyukung perintah ke bisi diatu deka ngasuh pejalai projek pemansang di sekeda menua tejanggal.

Tu deka ngasuh pemansang ti diperambu laun datai tauka tejanggal,” ku iya.

Iya ke mega Kaban Parlimen (MP) Sri Aman mansutka jaku tu lebuhka bejaku bejadika Program Pemesai Begulai Enggau Rayat diatur Komiti Pemansang enggau Pengelikun Genturung Pendiau ( JKKK) Rumah Udin, Sapak Pantu ditu, pagi kemari.

Nitih ku iya, kerejasama rat nadai ngira bansa enggau penuduk dalam komuniti antara perintah enggau rayat ngemuntangka perintah ngelangkar sereta bejalaika pemansang ngambika kitai enda terus tinggal dibanding enggau komuniti bukai di nengeri enggau menua tu.

“Rayat patut pintar milih bala ketuai ti bepenau ngemansangka rayat nadai ngira di mengeri tauka menua pesisir.

“Kitai pechaya, rayat dekaka seruran bisi pemansang, nya alai sukung nadai bebagi ngagai perintah ti nyadi pilih pemadu manah ba pengawa neruska pemansang di nengeri tu,” ku iya nerang nyemetak.

Pia mega ku iya, rayat patut ngenang baru pemujur perintah BN ngemansangka nengeri tu enggau bemacham projek pemansang nadaika mit tauka besai.

“Nyenggala dipeda semina perintah BN aja ulih ngemai ubah ngagau rayat lalu nadai agi kebuah rayat patut nulak pemansang dibai perintah BN,” ku iya nerang.

Masir mega ngemai rayat nulak semua petenah enggau jaku asut piak penyakal ti dkumbai iya seiti ulah minta kasih ngambika nyukung sida (penyakal).

“Kitai semua ulih meda, rayat enda mudah tunduk enggau ulah nya lalu rayat kitai udah nemu milih ni bagi ke manah enggau enda,” ku iya nandu.

Sama bisi datai bala ketuai komuniti ke bukai.

Berebak enggau nya, Masir mega bisi ngemendarka agih belanja ungkup taun 2018 penyampau RM30,000 dikena ngemanahka Rumah Panjai Udin ti sepemanjai 16 pintu.

Udah nya, RM3,000 agi diberi ngagai Biro Indu rumah panjai nya.