Program My Lesen, SKSJ mujur mantu urung 14, 958 iku penguna di Sarawak
SARIKEI: Sepenyampau 14,958 iku orang tuai di Sarawak udah mujur ngembuan lisin deriba motosikal B2 pengudah Program Satu Komuniti Satu Opis Perengka Pengangkut Darat ( JPJ) (SKSJ) enggau Program My Lesen ti dipejalai ari taun 2009.
Menteri Muda Perambu Mengeri, Pengatur Tanah enggau Rampa Menua, Datu Len Talif Salleh madah seraya di serata Malaysia, sepenyampau 122,654 orang tuai udah mujur teulihka lisin sida nengah program tu.
“Nengah program tu, kitai ngarapka semua penguna jalai alun sekalika di kandang mengeri enggau mega menua pesisir ulih ngemeran sereta nitihka konsep deriba ti manah sereta nitihka semua pekara pengelikun ti udah diiri lebuhka belajar deriba.
“Ulah nitihka undang-undang jalai alun beguna endar nentuka sida ti deriba enggau semua penguna jalai alun ke bukai seruran likun maya betengahka jalai alun.
“Pengawa ngaul semua bansa dalam program enggau pengawa diatur JPJ gawa ngagai pun menua nentuka servis datai ngagai rayat deka nentuka semua pejalai pengawa muntang dikereja enggau nitihka peneka perintah nengah konsep Gagasan 1Malaysia,” ku Len.
Iya mansutka jaku tu rambau Pengawa Bejadika Penutup SKSJ di Balai Komuniti Kampung Selalang, lemai kemari.
Rambau atur pengawa nya, bisi 480 iku orang tuai udah nerima lisin B2 nengah program SKSJ ti udah diatur dalam bulan April tu tadi.
Nitih ku Len, pengawa ke sama endang patut dikerembai sereta chakah agi dipejalai jemah, kelebih agi ti ngaul komuniti di menua pesisir enggau menua ulu.
Rambau pengawa nya mega, Len meransang bala komuniti nambahka penyapai ba pekara ngembuan lisin, kelebih agi ngaul entukar besai enggau teknologi tinggi.
“Diatu, dalam seruyut enggau pengerembai industri menua tu ngerembai mansang, peminta ngagai komuniti ngembuan lisin injin besai enggau bisi teknologi tinggi endang seruran beguna.
“Nya alai, kitai dekaka komuniti meda pekara tu nyadi seiti peminta pemadu manah dikena ngemansangka diri, laban makit enggau peminta udah bisi ngadaka penatai pemisi ti manah ngagai sida ti bisi penau,” ku Len nyemetak.
Berebak enggau nya, Len ke mega Kaban Kunsil Nengeri ( ADUN) Kuala Rajang, mega muji pengawa dipejalaika piak JPJ ti udah ngena konsep inisiatif mesra rayat enggau konsep gawa ngagai pun menua mantu komuniti ngulihka lisin.
“Ubah ba servis mensia mayuh udah ngemeratka pekara intergriti ngagai sida ti gawa perintah, kelebih agi ba ejensi penerit adat baka JPJ ngambika terus dipebasa bala komuniti.
“Dalam servis mensia mayuh, penyapai ti diasaika kitai iya nya dikena nyukat tikas penyulut dudi hari,” ku Len nandu nyemetak.
Sama bisi datai Kaban Parlimen ( MP) Tanjung Manis, Datuk Hajah Norah Tun Abdul Rahman, Sapit Ketuai Direktor JPJ Malaysia, Datuk Wan Uzir Wan Sulaiman, Direktor JPJ Sarawak, Mohd Syafiq Anas Abdullah, Residen Bagi Menua Sarikei, Mohamad Junaidi sereta Pemangku Pemesai Pelilih Sarikei, Badjuri Bidin.