Palan Bedaja Simpang Nyabor beungkus RM250,000 deka digaga enda lama agi
KABONG: Sebengkah Palan Bedaja Simpang Nyabor ke beungkus RM250,000 deka digaga enda lama da agi.
Kaban Parlimen (MP) Saratok, Tan Sri William Mawan Ikon madahka palan tu deka digaga nyadi seiti perengka guna ungkup peranak menua nya ti deka ngaul diri dalam pengawa dagang sereta nyuak produk betanam betupi sida.
“Kitai deka meda industri betanam betupi mansang di menua tu, laban ari perati ti udah digaga, kandang menua tu enggau besemak ulih mansang enggau pengawa betanam betupi.
“Engkeman sereta bisi peminta tinggi ngagai produk asil betanam betupi di menua tu ulih komuniti sereta mega pengusung ari luar udah nyata ngayanka produk betanam betupi di menua tu nerima peminta ti tinggi.
“Nya alai, dikena ngemuntang raban tu chakah sereta berat agi gawa dalam bidang tu, kitai deka nirika sebengkah palan bedaja ditu, ngemuntangka raban orang bumai enggau betupi nyual produk sida enggau lantang sereta sistematik agi,” ku iya.
Mawan mansutka jaku tu rambau Pengerami Ramah Tamah Aidilfitri, di Kampung Sessang, lemai kemari.
Bisi 800 iku pengabang bisi datai ngulu pengerami nya.
Tandu Mawan, pengawa ngaga perengka guna tu mega kelai teriman kasih ngagai bala komuniti ti udah meri sukung tegap ngagai perintah Barisan Nasional (BN).
Berebak enggau nya, Mawan mega ngemendarka pengawa ngaga sebuah balai komuniti baru ungkup peranak Kampung Sessang.
Sama bisi datai Kaban Kunsil Nengeri ( ADUN) N.40 Kabong, Mohd Chee Kadir enggau Pemesai Pelilih Kabong, Kamaludin Haji Alkap.