PRU14: Salang udah sedia nyema agi dipilih PRS ngetanka penuduk
PAKAN: Pengari empat penggal penuduk Parlimen Julau Datuk Joseph Salang Gandum udah besedia napi Pengawa Bepilih Besai Ke-14 (PRU14) ti deka datai.
Tang ku iya semua nya bepun ari pemutus Parti Rayat Sarawak (PRS) enggau Barisan Nasional (BN) nyema agi ngarapka iya ngetanka penuduk nya.
“Aku semampai besedia bediri ba Parlimen Julau enti aku agi dipilih baru.
“Aku agi ulih meri servis ngagai rayat ditu lalu nadai penanggul ba pekara pengerai,” pia ku iya madah.
Iya bejaku munyi nya maya pengerami begulai enggau rayat di Rumah Elli enggau Rumah Jenang ditu, ujung minggu tu tadi.
Penemu iya tu dibantaika iya dikena nimbal peminta rayat dia ti agi begunaka iya nyadi pengari rayat ba Parlimen Julau.
Salang, 67, mega Sekre- tari Besai PRS kelimpah ti nyadi Chairman Penyanding Penemu Kaunsil 1Malaysia Sarawak.
Berebak enggau dua bengkah pengerami ke digulu iya nya, iya madah, endang baka ngelama tu bisi orang datai mandangka diri ngining deka bediri ba sesebengkah penuduk ninting maya pengawa bepilih deka diatur.
Ulah tu ku iya baka kontriktor ti nginau projek besemekih ngulihka tender.
“Enti bisi nasib, sida deka diberi tender sepengudah tikas pemanah sida diperatika enggau silik dulu ngambika sida endang sigi orang ke ulih bejalaika pengawa.
“Nya alai, anang irau ke orang baka tu,” ku iya madah baru.
Nambahka jaku iya, Salang minta rayat ba menua nya semampai meri sukung enggau kerejasama ngagai iya enggau Kaban Kunsil Nengeri ( ADUN) Meluan Roland Duat.
Sukung ngagai MP enggau ADUN ku iya deka ngelantangka agi rayat dia nerima mayuh agi macham bengkah projek enggau geran pemansang.
“Anang ngaga bida antara kami duai laban kendua bela pengari ari BN,” pia ku lalau iya.
Salang madah, iya enggau Roland nadai laya tauka beserekang penemu enggau pangan diri taja nyentuk ke diatu empai kala dipeda begulai maya datai ngulu pengerami.
“Kendua bela bisi program kediri empu ti meseti dikemeratka,” ku iya nerang.
Ba Rumah Jenang, Salang bisi nyuaka geran projek mit menua pesisir (ungkup Pakan renggat keterubah) sepenyampau RM631,000 ngagai 40 Komiti Pengintu Pengelikun enggau Pemansang Genturung Pendiau (JKKK) enggau gerempung ukai dikuasa perintah.