Mayuh tanah NCR di Sarikei udah disukat
Naka diatu perintah mujur nyukat urung 348,000 hektar nyengkaum ba Merurun, Julau
JULAU: Naka diatu perintah udah nyukat urung 348,000 hektar tanah adat Bumiputera (NCR) ba pelilih Sarikei nengah inisiatif baru sukat kelinggi.
Penyampau tu bela mungkur 260,000 hektar di Merurun, Julau ditu.
Kaban Parlimen Julau Datuk Joseph Salang Gandum madah, penyampau tu mega mandangka pelilih Sarikei pemadu mayuh tanah udah disukat nengah inisiatif nya.
“Pemujur tu bepun ari mensia mayuh diatu udah nemu pemesai reti tanah sida disukat lalu enda pechaya tauka nangi cerita sebubu ngapa ke ditempa bekaul enggau inisiatif nyukat kelinggi nya,” pia ku iya madah.
Iya mantaika pekara nya sebedau pengawa nyuaka setipikit tanah ngagai 66 iku tuai rumah ari Merurun ba bala mensia mayuh ditu, empai lama tu tadi.
Nambahka jaku iya, ku Salang, setipikit ke disua sehari nya deka ngemuntangka mensia mayuh ke beempu tanah ngemansangka tanah sida.
Tu ku iya nyengkaum ngaga pemansang tanah enggau chara begulai enggau piak bukai.
“Nangkan ke tu kita tau minta ngagai perintah nyukat tanah enggau chara kediri/ individu nengah Seksyen 18 State Land Code dikena ngambi setipikit tanah diri empu,” ku iya madah baru.
Ku Salang, sida tau minta saup injin pemansang tanah ari perintah baka SALCRA, FELDA tauka MPOB nge- mansangka tanah sida.
“Enti udah bisi setipikit, tanah kita enda ulih lenyau.
“Tang enti tanah nya dike- mansang kita deka bulih penguntung lalu lantang deka ngangkatka tikas pengidup diri,” pia ku iya madah.
Pemujur tu bepun ari mensia mayuh diatu udah nemu pemesai reti tanah sida disukat lalu enda pechaya tauka nangi cerita sebubu ngapa ke ditempa bekaul enggau inisiatif nyukat kelinggi nya. ” Datuk Joseph Salang Gandum Kaban Parlimen Julau