WIEF ke-13 dibuka ngagai semua orang dagang

KUCHING: World Islamic Economic Forum (WIEF) ke-13 ti nungkatka rambai jaku ‘Distruptive Change: Impact and Challenges” ke diatur bulan November taun tu, dibuka ngagai semua orang dagang, pia ku Chairman, WIEF Foundation, Tun Musa Hitam.

“Juluk kitai urung 2,000 iku datai ngulu forum ke diatur 21 - 23 November tu ke diatur ba BCCK di Kuching ditu.

“Forum tu ukai semina ungkup orang dagang Islam aja tang dibuka ngagai semua orang ari mayuh bengkah industri tauka dagang, Kitai deka narit orang dagang ke ukai bepengarap Islam datai ngagai forum tu.

“Laban juluk kitai deka nyapai sereta nyungkakka dagang ke lalu ulih meri penguntung ngagai Sarawak tu empu,” ku iya.

Iya mansutka pekara nya lebuh bejaku ba aum pengarang berita World Islamic Economic Forum (WIEF) ke-13 ba sebuah hotel ditu, kemari.

“Nengah kerejasama (WIEF Foundation enggau perintah nengeri), kitai arap bendar ulih matak pemeranak puku ari mayuh bengkah industri senipak enggau ju- luk kitai deka ngenegapka ekonomi Sarawak,” ku iya.

Nitih ku iya, sebedau tu forum nya udah mujur diatur ba menua Kazakhstan, Indonesia, Kuwait, Pakistan, United Kingdom enggau United Arab Emirates.

Sebedau tu, di Malaysia forum tu kala digaga diluar Kuala Lumpur iya nya di Johor Bahru maya WIEF ke-8 ba taun 2012.

Iya madahka forum sereta rambai jaku ke sekali tu, senipak bendar enggau gaya ekonomi dunya ti kena empas mayuh macham pekara ari ubah polisi dagang ngagai keruga teknologi.

Senipak enggau rambai jaku, forum nya deka mekuh ngagai pekara ti bekaul enggau Disruptive Science, Techonology and Innovation; Halal Consumables and Service, Islamic Finance and Law, Seni, Main Asal kelimpah ari pengawa dagang.

Forum ke diatur di Kuching dikearapka ulih nyendia sereta nyadi pelasar ngelakuka kerejasama menua kelebih agi dalam menua ASEAN, sereta nyendiaka peluang dagang kelebih agi ungkup orang dagang mit enggau jelan pemesai (SME) ke udah enggau baru deka berengkah.