Sarawak dipilih nyadi endur ngatur WIEF ke-13 2017
KUCHING: Sarawak dipilih nyadi tuai rumah endur ngatur program renggat dunya, iya nya World Islamic Economic Forum (WIEF) ke-13, kena 21 ngagai 23 November 2017 ba BCCK ditu.
Sapit Kepala Menteri, Datuk Amar Awang Tengah Ali Hasan madahka diri temegah ati nengeri tu dipilih sereta melabaka urung 2,000 iku datai ari serata dunya, ngulu forum ke diatur WIEF Foundation nengah kerejasama perintah nengeri.
Tu kedua kali Malaysia dipilih sereta diatur diluar Kuala Lumpur, keterubah endar di Johor Bahru WIEF ke-8, ba taun 2012.
“Forum tu peluang ti chukup besai reti ngagai kitai ba pengawa ngelakuka Sarawak lalu tu mega awak kitai narit pemeranak puku ari menua luar enggau madahka nama peluang dagang di nengeri tu,” ku iya.
Menteri Industri enggau Pemansang Pengawa Dagang nya mansutka penemu iya dalam aum pengarang berita WIEF Ke-13 ‘Disruptive Change: Impact and Challenges’ ke diatur WIEF Foundation ba sebuah hotel ditu, kemari.
Ku iya, penegap politik Sarawak udah mujur mantu Sarawak sebuah menua tauka palan endur beranakka puku pemadu tinggi.
Sarawak bisi SCORE, Foreign Direct Investement (FDI) sereta Domestic Direct Investment (DDI) kelimpah ari ngembuan kuasa karan ke ulih nyadi pematak pemeranak puku bejalaika aktiviti di nengeri tu.
Naka ke diatu SCORE mujur narit 22 projek ti beranakka puku ti berega urung RM33.64 juta dalam industri aluminium, ferroalloys enggau silikon polycrystalline.
Kepala Menteri ( Datuk Amar Abang Johari Tun Openg) dalam juluk deka nyungkakka ekonomi, iya chukup bebendar deka ngamatka Digital Ekonomi enggau atur pengawa ngemanahka infrastruktur telekomunikasyen di nengeri tu, ku iya.
“Perintah Sarawak komited deka mantu ngenukuka forum tu ulih dipejalaika enggau mujur, laban kitai nemu tu deka meri kitai kaul ti lebih manah enggau ketuai dagang ari menua tasik.
“Tambah mega forum tu ukai semina ungkup orang bepengarap Islam aja tang tebuka ngagai semua, ti pemadu beguna iya nya baka ni kitai ulih ngangkatka ekonomi sereta muka peluang dagang ngagai raban bansa kitai,” ku iya.
Kelimpah ari ngelakuka Sarawak nengah forum nya, perintah nengeri mega deka ngelakuka industri bepelasarka kayu, sektor servis baka industri dagang temuai enggau industri halal.
Sama bisi datai kemari, Chairman WIEF Foundation Tun Musa Hitam; Sapit Sekretari Perintah Nengeri Transformasyen Sosio Ekonomi Datu Ismawi Ismuni enggau Sekretari Besai WIEF Foundation Tan Sri Dato Ahmad Fuzi Abdul Razak.