Duit ti diinjau ari Yayasan Sarawak dibayar enggau manah, ku Azmi
KUCHING: Yayasan Sarawak berasai lantang ati laban orang ke nginjau duit ari palan nya sebarang penanggul mayar duit injau sida.
Direktor Yayasan Sarawak, Azmi Bujang madah,Yayasan Sarawak beruntung endar laban nembiak enggau apai indai ke udah nginjau duit ari Yayasan Sarawak dikena sida nampung pelajar, nadai napi sebarang penanggul mayar pulai duit injau sida ngagai Yayasan nya.
“Kami bisi nyendiaka mayuh insentif ngagai nembiak ke udah nginjau duit ari kami, ambika chunto, nyema nembiak nya mujur teulihka ‘First Class Honours’, Yayasan Sarawak meri diskaun 75 peratus ari penyampau duit injai ke patut dibayar pulai baru ngagai Yayasan Sarawak.
“Lalu sida ke udah mujur bulih ‘ 2nd Class Upper’ enggau ‘Lower Upper’ deka diberi diskaun manggai ba 50 peratus, lalu enti sida seruran mayar nitih timpuh ke ditetap, deka diberi diskaun 25 peratus.
“Tu gaya inisiatif ke diberi ngagai nembiak ke nginjau duit ari Yayasan Sarawak, laban inisiatif nya deka meransang nembiak mayar duit injau sida ngagai Yayasan Sarawak,” ku Azmin.
Iya madah munyi nya lebuh dikerandau pengarang berita sepenembu Pengerami ‘Ramah Tamah Aidil Fitri Yayasan Sarawak’ ba dewan Wisma Adenan di Jalai Sultan Tengah ditu, ti digulu temuai ti dibasa, Kepala Menteri Datuk Amar Abang Johari Tun Openg, kemari.
Iya mega madahka Yayasan Sarawak seruran ngelalau bala nembiak ke nginjau duit ari palan nya, iya nya lebuh sida udah bulih pemutus peresa ba taun keterubah sida belajar di universiti lalu nginjau duit ari Yayasan Sarawak, dia sida deka ngeluarka duit injau nya enggau jampat.
“Nya alai, nembiak ke nginjau duit nya patut mayar sida sebaka enggau penyampat Yayasan Sarawak ngeluarka lduit ke diinjau sida.
Ku iya, semina dalam kurang ari 0.1% ti enda mayar pulai duit injau sida
“Taja pia, ketegal enda mayar pulai sida nya deka nerima surat luyar kami.
Duit injau diberi Yayasan Sarawak ngagai nembiak ke datai ari ruang bilik ti kurang penatai pemisi ke deka nampung pelajar ngagai universiti perintah tauka peribit, kelebih agi enti sida udah mujur bulih endur belajar ba palan pelajar nya, lalu bedau nnginjau duit ari palan bukai.
“Kuantum penyampau duit injau tu bepanggai ba tikas pelajar, yuran universiti enggau sekeda belanja bukai, nya ke dikumbai penyampau duit injau. Penyampau nya urung RM20,000 tauka RM30,000.00,” ku iya.
Diatu, Yayasan Sarawak melanja urung 80% peratus ari bajet sida ungkup pekara pelajar.
Pengerami nya bela digulu Kepala Menteri Datuk Amar Abang Johari Tun Openg enggau bini iya, Datin Amar Dato Juma’ani Tunku Bujang, Sapit Kepala Menteri Datuk Amar Douglas Uggah anak Embas, Tan Sri James Jemut Masing, Datuk Amar Awang Tengah Ali Hasan, Menteri Pelajar, Sains enggau Pansik Teknologi, Dato Sri Michael Manyin anak Jawong, Menteri Opis Kandang Menua enggau Pengawa Berumah Datuk Prof. Dr. Sim Kui Hian, enggau Menteri Wang Kedua, Dato Sri Wong Soon Koh.
Ba pengeami Ramah Tamah Aidil Fitri Yayasan Sarawak nya mega, Abang Johari bisi nyuaka pemeri duit Raya ngagai dua buah palan anak mit, iya nya Taska Yayasan Ku Sayang enggau YAKIN (Yayasan Kemajuan Islam Nengeri).