Zahid nyida projek ngaga Sepital Sri Aman tejanggal
Tetiap projek perintah patut ditembu nitih timpuh ke ditetap laban semua nya ungkup pemaik rayat
SRI AMAN: Perintah enda ngelakka kunteriktor, konsultan sereta pemesai ti enda mujur nembuka projek nitihka timpuh ke ditetap lepas pia aja, Ku Sapit Menteri Besai Datuk Seri Dr Ahmad Zahid Hamidi.
Ku iya, tetiap projek perintah patut ditembu nitih timpuh ke ditetap laban semua nya ungkup pemaik rayat.
Bechuntoka projek ngaga sepital baru Sri Aman, iya ke mega Menteri Dalam Menua madah deka mantu ngelengkas pengawa nembuka sepital nya.
“Tajapan aku nadai kaul enggau projek tu tang nyadi seiku ketuai dikearapka Menteri Besai sereta kaling bukai dalam kabinet nengeri, aku ngasai diri ulih nyaup ngelengkaska projek.
“Aku bisi ngabas (ngenyit) ba palan ngaga Sepital Sri Aman laban projek nya udah laun 218 hari.
“Aku enda ngelepaska kunteriktor, konsultan tauka pemesai ti ngasuh projek nya lubah,”ku iya.
Zahid mansutka jaku nya ba ‘Program Ramah Tamah Ai-
Tajapan aku nadai kaul enggau projek tu tang nyadi seiku ketuai dikearapka Menteri Besai sereta kaling bukai dalam kabinet nengeri, aku ngasai diri ulih nyaup ngelengkaska projek. Datuk Seri Dr Ahmad Zahid Hamidi Sapit Menteri Besai Malaysia
dilfitri, Opis Menteri Dalam Menua(KDN)’ ke diatur ba Padang KPSU Lama di Sri Aman ditu, kemari.
Ngenang kaul ke sama, Zahid madah deka datai baru lalu berandau enggau Kepala Menteri Datuk Amar Abang Johari Tun Openg.
Randau nya ku iya, deka matak menteri ari Perintah Besai sereta pemesai ari opis menteri ke bekaul.
Ku iya, tetiap projek di Sarawak ti ditemu lubah ari perambu asal deka dikerandau.
“Aku deka ngambi atur ke lengkas ngambika kunteriktor ti enda mujur nembuka projek enda diberi timpuh sambung, sida patut beratka pengawa nembu projek nitihka timpuh ke ditetap.
“Tu mih juluk aku, kitai enda ngira pemesai projek... pemaik rayat nyadi pekara ti dikemerat lalu nya nyengkaum rayat ke diau di menua pesisir,”ku iya.
Nitihka perambu asal, projek Sepital Sri Aman ke beungkus RM200 juta disadang tembu dalam bulan Oktober 2018.
Bela datai ba Ramah Tamah Aidilfitri KDN, Sapit Kepala Menteri Datuk Amar Douglas Uggah, Speaker DUN Datuk Amar Mohamad Asfia Awang Nassar, Menteri Orang Indu, Ruang Bilik enggau Komuniti Datuk Seri Rohani Abdul Karim, Menteri Opis Kunsil Kandang Menua Datuk Prof Dr Sim Kui Huan enggau Sapit Menteri Dalam Menua Datuk Masir Kujat.