Bekerejasama nempa modal mensia, ku Ding
BINTANGOR: Apai indai enggau pengajar di sekula patut bekerejasama rat nempa modal mensia ti ulih manah dudi hari.
Kaban Kunsil Nengeri (ADUN) Meradong Datuk Ding Kuong Hiing madah penyulut sida nembiak iya nya bepun ari rumah.
“Nyadi apai indai, kitai mih ti deka nentuka sekalika tetiap anak kitai bisi diajar enggau ulah ti manah sereta ngembuan pengering dalam runding dikena napi semua pengawa ke enda manah di luar rumah,” ku iya lebuh ti bejaku bejadika Hari Beserumpu Sekula Sekondari (SMK) Bandar Bintangor, bedau lama.
Ba pengerami nya, sama bisi digaga iya nya Ngemunka Program Jogathin 2017, Nyuaka Bantu Tumu Sekula, Hari Pelaporan enggau Beserumpu Begulai enggau Apai Indai sereta Program Beripai Gerempung Apai Indai enggau Pengajar (PIBG) SMK Bandar Bintangor.
Ku Ding, enda asi enti kitai semina ngelempaika tanggungpengawa nyeridi anak ngagai pengajar enggau piak sekula aja.
Sentang pekara tu ku iya, PIBG sekula mega patut chakah agi nyukung pengawa dikena nempa ulah ti manah ba raban nembiak.
“Kitai andal laban naka ke diatu kerejasama rat ke udah dibantaika sekula enggau PIBG ba sekula tu. Meri besai tabi basa ngagai semua kaban PIBG pia mega enggau apai indai.
“Kerejasama ti manah tu udah mantu sekula ngangkatka tikas pemanah pelajar ba peresa PT3 enggau SPM taun nyin kemari,” ku iya madah.
Kelimpah ari nya, iya mega ngarapka apai indai ngenang pengawa bala pengajar lalu nyema bisi penanggul ti bekaul enggau bala anak, patut dibai berandau enggau manah.
Pemutus ti diambi enda enggau randau entara dua piak sereta jampat nyida enda ngenataika pemaik ngagai semua piak.
“Berindik ari nya, sukung PIBG dalam mantu sekula madah sereta bekunsika penemu bekaul program, aktiviti sereta pengawa ti digaga ngemuntangka piak sekula,” ku Ding.
Rambau atur pengawa nya, Ding mega madah deka nirika sebuah begunan sekula enggau ungkus RM38,000 dalam taun tu.