Seiku agi nembiak di Serian udah nadai ketegal Rabies

KUCHING: Seiku nembiak ke mega kes ti ketiga penyakit berampit ukui gila tauka Rabies ditukuka udah nadai lemai kemari.

Nitih ku Ketuai Direktor Pengerai Malaysia Datuk Dr. Noor Hisham Abdullah kes ketiga ke nyadi di bagi menua Serian iya nya seiku nembiak indu beumur 7 taun ari Kampung Lebor, Serian udah nadai pukul 2.16 lemai 13 Julai (kemari).

Niang Alicesa Lorenna Nody dianjung ngagai Unit Perubat Forensik, Sepital Besai Sarawak (HUS) urung pukul 3.30 lemai kemari lalu dibai pulai ngagai rumah sida di Stutong Baru, iya nya endur ngintu pemati.

Naka kemari, bisi empat kes Rabies di Serian, lalu tiga ari kes nya udah mai nyawa tauka mati lalu kes keempat diatu benung diperubat ba Unit Rawatan Rapi (ICU) HUS.

Naka pukul 5 lemai kemari, nadai kes Rabies ti nyadi ba mensia mayuh diripot, ku Dr. Noor Hisham nengah penerang berita.

Nambahka nya bepelasarka penerang berita ari Sapit Kepala Menteri ti mega Chairman Komiti Mutarka Penusah Ngenyit Nengeri Sarawak ( JPBNS) Datuk Amar Douglas Uggah madahka bisi tujuh genturung pendiau di bagi menua Serian udah ditukuka bisi igi penyakit berampit Rabies.

“Bisi tujuh genturung pendiau ditukuka bisi igi penyakit tu iya nya Kpg Paon Rimu, Kpg Paon Rimu Bakung, Kpg Remun, Kpg Lebor, Kpg Krait, Kpg Saroban enggau ke baru disahka seharitu (kemari) Kpg Tangga,” ku iya.

Naka ke diatu, Opis Servis Veterinari Sarawak (JPVS) begulai enggau ejensi perintah ke bukai enggau Gerempung Ukai Dikuasa Perintah (NGO) udah meri vaksin ngagai 1,975 iku jelu ti nyengkaum 464 iku ukui, 1,493 iku mayau enggau 18 iku jelu bukai.

JPVS mega udah ngatur 60 kimpin penyedar ke digulu 3,735 iku pesereta.

“Seharitu (kemari) raban pemeri vaksin udah meri vaksin di Kpg Slabi, Kpg Tangga Mawang, Kpg Ranchan, Kpg Rasau, Kpg Koran enggau Kpg Sorak.

“Raban pemeri vaksin deka ngatur kimpin di Serian kena Hari Enam tu(Sabtu15.07.2017) enggau Hari Minggu (Ahad-15.072017) berengkah pukul 10 pagi ngagai 4 lemai ba empat endur iya nya di Balai Babuk Gawing, Dewan Masyarakat Serian, Opis Veterinari Serian enggau Opis Pelilih Serian.

“Aku minta orang ke ngembuan jelu tupi datai ngagai endur kimpin nya diatur, ke alai pengawa meri vaksin bisi dipejalai lalu servis tu diberi enggau enda bebayar,” ku iya.

Aktiviti ngiga kes Rabies ke benung chakah dipejalai lalu udah mujur tetemuka sepenyampau 236 kes ketup ukui dalam kandang endur 10 kilometer ari kandang endur ke bisi igi penyakit nya di bagi menua nya.

Semua kes ketup ukui ba Kpg Lebor, Paon Rimu Bakong enggau Saroban ke patut diberi vaksin udah diberi, lalu penyampau semua nya bisi 188 kes.

Bisi 42 kes ketup ukui ti baru iya nya ke nyadi ari 2 Julai ngagai seharitu (kemari), ti nyengkaum 14 nyadi ba zon merah enggau 28 ba zon kuning.