Peranak Baram meseti neruska sukung ti teguh ngagai BN

MARUDI: Bala pengundi enggau penyukung di sitak Baram diansak meri sukung ti teguh ngagai chalun Barisan Nasional (BN) ti dipilih ba penuduk Baram maya Pengawa Bepilih Besai (PRU) ti deka diatur sebarang maya berengkah ari diatu.

Sitak Baram endang penuduk asal ke diungkupka perintah ngagai Parti Demokratik Progresif ( PDP) tauka sebedau tu Parti Demokratik Progresif Sarawak (SPDP), berindik ari nya entara 31 penuduk di nengeri tu BN enggau PDP udah ngirai pengari sida iya nya Anyi Ngau. Pengawa milih chalun ti deka nyadi pengari BN ba penuduk Baram enda ibuh diperebut tang pengawa nya deka ditentuka bala ketuai tetinggi BN ngiga sapa bagi dipilih ngagai genap iku chalun ti ngining penuduk Baram ba PRU14.

“BN udah nyata ulih gawaka rayat lalu chalun ti deka dikirai ila begunaka sukung ari semua kitai lalu ditu aku deka madah mimit ke alai piak bekuasa tetinggi sekalika tikas perintah besai tauka kom- ponen parti BN-PDP empu udah ngirai baru Anyi Ngau lalu tu udah diperati bala ketuai tetinggi lalu kitai semua patut nyukung Anyi.

Pekara tu udah dipansutka Sekretari Politik Kepala Menteri Sarawak, Alexander Asing John Sadai rambau bejaku ba pengerami Ngiling Tikai diatur Opis Pekara Khas (JASA) Baram di Rumah Tuai Rumah (Tr) Lalo Akang, Rumah Panjai Sg Selejau, Melikat kena malam Hari Enam.

Alexander Asing ke mega Chairman SPDP Bagi Menua Marudi nambah, semua sida patut nemu tanggungpengawa diri empu laban kitai deka nagit bulih undi majoriti iya nya lebih ari 2,000 undi.

Iya mega deka mesan ngagai chalun bukai ti deka ngirai diri ngerebut penuduk nya ngambika anang ngaga cherita selebubu ngapa.

Penuduk Baram dipenggi chalun SPDP tauka PDP ari komuniti Kenyah lalu enda ibuh sida angkun ke sitak nya ketegal chalun ti deka dikirai ngetanka penuduk tu endang ditemu sereta dikelala peranak Baram.