Perintah nengeri udah ngemendar perambu ngaga Jematan Btg Saribas
PUSA: Menteri Muda Jalai Tebing Pantai Datuk Julaihi Narawi beterima kasih ngagai perintah nengeri laban udah ngemendarka perambu ngaga projek Jematan Batang Saribas.
Nya alai, iya ngelalau peranak menua pesisir tebing pantai lebih agi ba Pusa enggau Beladin ngambi peluang ke bisi dikena ngelakuka produk bepelasarka pengawa betanam betupi enggau berikan dikena nyungkak penatai pemisi ba sitak nya pengudah jematan nya tembu jemah.
Iya madah munyi nya rambau bejadika randau pasal ‘Coastal Road/Proposed Saribas Bridge Under Coastal Connectivity Programme’ begulai enggau komuniti sereta ketuai raban bansa diatur Opis Menteri Pemansang In- frastuktur enggau Perengka Pengangkut sereta kerejasama Opis Kereja Raya (JKR) enggau Opis Residen Betong ba Dewan Datuk Godam ditu, apin lama ke udah.
Iya madah projek jematan nya patut digaga laban ba pelilih-pelilih mit menua pesisir ke bukai udah lama digaga.
“Ambika chunto, penyampau mensia di Pusa udah manggai 10,000 iku lalu tu kebuah projek tu patut digaga,” ku iya ke mega ADUN Sebuyau.
Iya mega ngarap projek nya ulih tembu nitihka Langgur Pemansang Malaysia Ke-11 (RMK11) lalu palan diperambu ngaga Jematan Batang Saribas ba taba feri kediatu bepelasarka timbal ari program randau begulai enggau komuniti Pusa enggau Beladin.
“Projek jematan tu endang pengenap ngagai tampung jalai menua pesisir ba nengeri Sarawak,” ku iya.
Sama bisi datai ba randau nya Menteri Muda Perengka Pengangkut Datuk Dr Jerip Susil, ADUN Beting Maro Razaili Ghapor, Sekretari Mendam Opis Menteri Pemansang Infrastruktur enggau Perengka Pengangkut Safri Zainudin sereta Residen Betong.