40 nembiak SK Agama Bintulu diajar pasal penyakit dibai jelu
BINTULU: Bisi 40 iku nembiak Taun Lima Sekula Primari (SK) Agama Bintulu, Majlis Islam Sarawak diberi penerang nengah mayuh aktiviti bekaul enggau bansa patogen, chara transmisyen patogen zoonotik sereta bansa penyakit zoonotik nyerumba Program Penemu Pasal Penyakit Zoonotik Sekula kena Hari Satu tu tadi. Sekula nya endang sekula iru Universiti Putra Malaysia Kampus Bintulu (UPMKB). Program tu dibagi ngagai dua renggat.
Urung 20 iku raban volunteer ke udah dilatih ngemujurka program tu.
Berindik ari penyampau kes penyakit zoonotik ke bisi nyadi ba komuniti baka leptospirosis (penyakit kemi chit) enggau rabies, nyadi beguna amat nembiak sekula diajar dikena nyeliah diri kena rampit igi penyakit zoonotik.
Program tu dipelanja Malaysia One Health University Network (MyOHUN) enggau USAID. Tu kedua kali program baka tu diatur ba menua tu lalu keterubah iya di Sarawak.
UPMKB dipilih ngemujurka program tu pengelama dua hari ungkup bala nembiak nembiak sekula sereta nengah kerejasama Dr Mohd Mokrish Md Ajat ari Fakulti Perubatan Veterinar UPM Kampus Serdang enggau Dr Juriah Kamaludeen ari Fakulti Pertanian sereta Sains Makanan UPM Kampus Bintulu.
Projek tu mega mungkur kerjasama pemansik ari Universiti Malaya, Universiti Kebangsaan Malaysia (UKM) enggau University of Surrey UK.
Renggat kedua program tu deka diatur ba Makmal enggau Ladang Tenusu UPMKB kena Hari Dua.
Pengari pengatur madah, program tu deka numpu ngagai chara pemadu manah ngajar nembiak sentang nyeliah diri ari penyakit zoonotik.
“Tuju iya ngambika bala nembiak sekula primari mereti agi pasal penyakit zoonotik enggau chara nyeliah diri ari penyakit nya,” ku iya.