Utara S’wak manah endur nanam kemiding
Tanah kerapa ba Miri, Limbang chukup manah dikemansang nyadi palan nanam kemiding
LIMBANG: Tanah kerapa ba utara nengeri tu manah dikemansang nyadi palan nanam kemiding dandang besai lebih agi ba bagi menua Miri enggau Limbang.
Menteri Muda Betanam Betupi Dr Abdul Rahman Ismail madah perintah nengeri nengah Opis Menteri Betanam Betupi Moden ngena chara baru mantu orang bumai ari sukut ngemansut sereta nyual.
Ku iya perintah beratika penau tanah sesebengkah endur sereta bansa utai tanam ke ulih diasil.
“Ungkup sitak utara Sarawak, tebal agi tanah kerapa endang engkeman endur nanam kemiding,” ku iya madah ngagai media maya ngabang raya ngagai rumah Chairman Gerempung Melayu Limbang ( PML) Mohamad Abu Bakar ditu, kemari.
Dr Abdul Rahman madah munyi nya lebih nimbal pasal Projek Nanam Kemiding dipengi Wong Hua Soon di Kuala Baram ulih ngemansutka 80 kilogram (kg) kemiding sehari ba tanah 10 ekar.
Ku iya, tu bepelasarka pemujur pengawa nanam kemiding ba Kuala Baram Miri lalu nya meri penguntung ke besai ngagai penanam.
Nengah rega makit diatu RM13 sekilogram, iya ulih untung manggai RM30,000 sebulan.
Sapit Kepala Menteri Sarawak Datuk Amar Douglas Uggah Embas ti mega Menteri Betanam Betupi Moden Datuk Amar Douglas Uggah Embas bisi ngabas palan projek nya bulan Jun tu tadi.
Ku iya, opis menteri deka mantu sitak nya ari sukut perengka guna.
“Kitai mega deka beratika chara ke sebaka ungkup pengawa nanam kemiding ba Limbang,” ku iya.
Nangkan nya ku iya, Stesyen Betanam Betupi Kubong Limbang deka dikemansang nyadi ‘Palan Mendam Pengeluar Pemakai (TKPM).
Nitih ku iya mega, TKPM endang sebengkah program perintah dikena numbuhka zon mendam ngemansutka asil pemakai ba nengeri tu.
“Bisi 15 orang bumai di- engkah ba TKPM Stesyen Betanam Betupi Kubong bejalaika pengawa nanam buah temedak, nangka, pisang enggau nyengkaum nanam kemiding.
“Pengawa tu dikemansang dikena nempa Sarawak nyadi pengeluar asil betanam betupi sereta meransang raban orang bumai ngereja pengawa betanam betupi nyadi pengawa dagang,” ku tandu iya.
Bela bisi datai iya nya bini Dr Abdul Rahman Dayang Maimunah Awang Mohd Daud, Penghulu Abu Tinggal, Ketuai Genturung Pendiau Seberang Kedai Rosli Rambli sereta temuai bukai.
Ungkup sitak utara Sarawak, tebal agi tanah kerapa endang engkeman endur nanam kemiding. Dr Abdul Rahman Ismail Menteri Muda Betanam Betupi