Zahid mantu ruang bilik ke dituntung penusah ketegal virus rabies

KUCHING: Sapit Menteri Besai Datuk Seri Ahmad Zahid Hamidi ensanus nyuaka bantu ari kuchik iya empu ngagai ruang bilik di pelilih menua Serian ke dituntung penusah parai anak ketegal penyakit ukui gila (Rabies).

Ahmad Zahid ke nemuai dua hari ke Kuching enggau Sri Aman,udah nyuaka bantu RM60,000 ngagai ruang bilik di Genturung Paon Rimu, Serian, ke diterima Mazlan anak Punjan enggau bini iya, Elisa anak John ke dituntung penusah parai dua iku anak, iya nya niang Monica 6, enggau menyadi iya, Jackson,4 taun ketegal penyakit Rabies bedau lama tu tadi, di padang bilun Hornbill Skyways ditu, ensanus.

Pemeri ari Sapit Menteri Besai nya deka dikena ngaga rumah sida ke nyau udah buruk, ngambika bisi palan diau ke manah agi.

Bedau lama tu tadi, anak seduai iya, Monica enggau Jackson ari enam iku diri menyadi ditaban ke Sepital Besai Sarawak (HUS) ketegal penyakit berampit Rabies, lalu enda ngeleda nyentuk ke seduai menyadi parai.

Diatu semina empat ari enam iku anak seduai iya agi, siku lelaki (12 taun), enggau tiga iku indu (umur 11,8 enggau 9 bulan).

Sama bisi ngulu Ahmad Zahid kemari sebedau iya bekejang ngulu sebengkah pengerami di Sri Aman, iya nya Sapit Kepala Menteri Datuk Amar Douglas Uggah anak Embas, Speaker Kunsil Nengeri (DUN) Datuk Amar Asfia Awang Nassar enggau Menteri Opis Kandang Menua enggau Pengawa Berumah, Datuk Prof. Dr. Sim Kui Hian.

Apai enggau indai niang Monica seduai Jackson ti ngemeranka pengawa bumai lsereta bekuli enggau orang, lebuh dikerandau kemari meri terima kasih ngagai perintah nengah Ahmad Zahid laban beratka penusah ti nuntung sida menyanak.

“Aku meri terima kasih ngagai perintah kelebih agi ngagai Sapit Menteri Besai laban beratika nasit kami menyanak, kelebih agi kami ulih ngaga rumah baru ari ru- mah ti diterima kami diatu,” ku Elisa.

Berebak enggau nyai, Ketuai Komuniti ke nyempulang seduai melaki bini, Stephen Empudod bela beterima kasih ngagai perintah ke pemeri nya.

“Aku ngarika sida sebilik ke napi penusah nya, meri terima kasih ngagai perintah, ngagai Sapit Menteri Besai, ke siru sereta berat ka komuniti kami, ti ukai semina mantu ngelempung tating penusah tu aja tang mega meri bantu ngambika ulih ngaga rumah baru endur sida i diau.

“Tu udah masuk tiga hari rumah sida iya digaga kunteriktor China ari Serian, ngena bantu ke diberi perintah,” ku Stephen.