Bisi 24 iku nembiak sekula di Skrang nerima baucher pelajar ari Yayasan Sarawak
SKRANG: Kaban Kunsil Nengeri (ADUN) Engkilili Dr Johnical Rayong Ngipa bisi nyuaka baucher peransang pelajar Yayasan Sarawak bela penyampau RM200 ngagai 24 iku nembiak sekula di begunan Sekula Primari (SK) Issu Bangat Lidong ditu, Hari Enam tu tadi.
Ari penyampau nya, 10 iku nembiak ari SK Issu Bangat, tujuh iku ari SK Ng Lidong seraya tujuh iku ke bukai ari SK Ng Enteban lalu kesemua tiga buah sekula primari tu endang pegai sitak Skrang.
Rayong, ti ngarika bala nembiak enggau apai indai sida, meri basa besai ngagai pemanah budi Yayasan Sarawak ungkup pengelantang rayat.
“Aku nemu pemeri Yayasan Sarawak tu deka pulaika pemaik ngagai bala nembiak enggau apai indai sida ngelempungka tating belanja sekula. Penyampau tu nyangka enda mayuh tang chukup kena meri peransang ngagai bala nembiak sekula ransing belajar,” ku iya.
Pengari Yayasan Sarawak diuluka Abang Azrianto Abang Bohari bisi datai ngemataka pengawa nyuaka baucher nya.
Rayong mega ngelalau kaban Serakup Apai Indai enggau Pengajar ( PIBG) tiga buah sekula nya gawa rat begulai ngangkatka tikas pemanah akademik bala nembiak.
Ku Rayong, iya dekaka standard Jaku English di sekula dikemanah sereta bala pengajar enggau nembiak ulih bejaku dalam Jaku English.
“Aku deka mesa kesemua tiga buah sekula tu nyadi chunto ngagai sekula primari ke bukai,” ku iya.
Berebak enggau pengawa sehari nya, Rayong mega bisi ngemendarka geran Projek Mit Pemansang Menua Pesisir (MRP) penyampau RM10,000 ngagai SK Issu Bangat dikena ngemanahka sebarang perengka ke patut sereta dikena melanja ngemai bala nembiak sida bejalai ngagai palan pelajar tinggi nyadika peransang bala nembiak sida ransing agi belajar.
Rayong mega ngelalau kepala pengajar SK Issu Bangat ngambika nukar perabung sekula nya.
“Kira ungkus lalu padah ngagai aku. Aku deka ngena belanja Program Transformasyen Menua Pesisir (RTP) perintah dikena melanja iya,” ku Rayong.
Dulu agi ari nya Rayong ngemataka latih penusah angus ti dipejalai tim ari Opis Pengerara Api enggau Penyah Penusah (Bomba) enggau tuju deka mandang ngagai bala pengajar enggau nembiak ba tiga buah sekula baka ni chara ngena perengka pengerara api enggau betul ba sebarang penusah maya angus ti nyangka nyadi di sekula.
Sama bisi datai rambau latih ke udah diatur di SK Issu Bangat iya nya Pemesai Kaban Bomba Betong, Judi Numpang.
Rayong bejadika pengawa latih penusah angus enggau pengawa ngerara api dalam dram ngena perengka pengerara api.
Iya udah nya merambu ngagai piak Bomba ngambi ngemanahka pum enggau perengka ngerara api sida sereta mega nentuka pili bomba seruran bisi bekal ai paip sereta nadai penanggul.
Ku iya, kenyau ari iya dipadu nyadi ADUN Engkilili, bisi enam buah rumah panjai udah angus.
Iya pechaya rumah panjai tu enda ulih diselamat nyangka ketegal kangau penusah ngenyit nengah telefon nuju Opis Bomba lubah tauka timbal ari opis pengerara api kelalu lubah.
Iya mega bisi nerima sebana bisi maya hos pengerara api enda ulih dikena sereta tekanan ai baruh.
“Aku empu kala meda di Pelasok enggau Enteban lebuh Bomba enda ulih nyelamat taja sebagi ari begunan,” ku iya asa.
“Pia mega ngagai bala pengajar enggau nembiak SK Issu Bangat, SK Ng Lidong enggau SK Ng Enteban, nyema bisi sebarang penusah angus di sekula kita, ba runding aku nadai pekara ulih digaga kita. Telefon aja ngagai Opis Bomba besemak enggau jampat. Jampat ngelarika diri ari endur penusah nyadi kena nyaga pengelikun diri,” ku Rayong.
Rayong ngelalau bala pengajar enggau nembiak seruran bejejaga sereta nentuka begunan sida nadai sambung tali karan ti bepenanggul minta bala Bomba suah agi bejalaika pengawa meresa.
“Pinta pengawa ngemanah nyema kita bisi meda sebarang penanggul ba sambung tali karan ke bisi diatu,” ku iya ngelalau sida.
Sama bisi datai Pemesai Pekara Khas Edwin Ancheh ti ngarika Kaban Parlimen (MP) Lubok Antu Datuk William Nyalau Badak ketegal bisi pengawa bukai di Lubok Antu, sereta SAO Ludan Lintong ti ngarika Residen Betong, bala ketuai opis perintah ari Betong, Sekretari UPP Pampang Engkilili Kaunsilor Nyambong Mawing, bala tuai rumah, apai indai enggau bala pengajar.