Agih RM36 juta ungkup NCR enda tau dibasau sengapa
PRS sigi meratika enggau berat pekara ke bekaul NCR
KUCHING: Parti Rakyat Sarawak (PRS) dekaka belanja RM36 juta ari Perintah Besai ungkup pengawa nyukat kelingi tanah ungkup taun 2017 enda diguna ungkup tuju bukai.
Presiden iya, Tan Sri Datuk Amar Dr James Jemut Masing ba aum pengarang berita pengudah Aum Supreme Kunsil PRS ditu, kemari madah pengawa nyukat kelingi nya diatu chukup lubah.
“Parti Dayak sigi meratika enggau berat pekara ke bekaul enggau tanah adat bansa asal (NCR).
“RM36 juta ke diagih Perintah Besai meseti diguna ungkup taun tu lalu anang dibasau ba pekara bukai,”ku Masing.
Masing ke mega Sapit Kepala Menteri enggau Menteri Pemansang Infrastruktur enggau Perengka Pengangkut nambah, PRS merambu pengawa nyukat kelingi nya digaga besai sekali iya nya mungkur tanah ke diempu mayuh bengkah rumah panjai.
Ku iya, chara nya deka nentuka tanah NCR ulih dibidaka ari tanah ke diempu Perintah Nengeri.
“Tembu pengawa sukat
RM36 juta ke diagih Perintah Besai meseti diguna ungkup taun tu lalu anang dibasau ba pekara bukai. Tan Sri Datuk Amar Dr James Jemut Masing Presiden PRS
kelingi ila baru sida nyukat tanah orang seseiku.
“Enti bisi penanggul, pekara nya meseti diputarka dulu entara orang bempu tanah,”ku iya.
Iya nambah, pengawa nyukat kelingi ba sekeda kandang endur nya diatu lubah ketegal duit mayuh dipelanja ba Seksyen 18 ti begunaka timpuh panjai sereta nguna mayuh belanja.
“Pekara ke berat diatu iya nya pengawa nentuka tanah NCR enggau tanah ke diempu Perintah Nengeri.
“Kitai(PRS) ngarap agih belanja ke diberi Perintah Besai dipelanja enggau lengkas,”ku iya.