Bemacham aktiviti diatur beserimbai enggau Kimpin Pengerai ba KKIA RCBM

KUCHING: Kelinik Pengerai Indai enggau Anak (KKIA) Sepital Rajah Charles Brooke Memorial (RCBM) udah mujur bejalaika Kimpin Pengerai ti diatur begulai enggau raban Program Diploma Lanjutan Kejururawatan Kolej Sains Kesihatan Bersekutu (KSKB) ditu kilah ensana.

Program ti berambai jaku ‘Wanita Sihat Tanpa Kanser’ ke diatur sehari tu udah dipenyadika Pemesai Pengerai KKIA RCBM Dr Flora Riti Lungah, lalu udah digulu urung lebih ari 50 iku pesereta. Mayuh macham aktiviti udah digaga semanjai program tu ti ukai semina deka nentuka mensia mayuh bejalaika pengidup ti bepengerai, tang mega dikena matak sida kelebih agi orang indu datai ngambika nemu sekeda igi penyakit ti tau nyadi.

Nitihku Dr Flora, batang tuju program tu iya nya dikena meri penyedar ngagai orang indu bekaul penyakit riman serviks ti mayuh nyadi ba orang indu di menua Malaysia ke tau ngujungka pemati. Penyedar ti tumu bakani penyakit tu ulih nyadi endang dikemerat laban nyema ulih ditemu enggau tumu, penyakit riman tu ulih diseliah.

“Nitihka pansik, penyakit riman serviks iya nya penyakit riman ti kedua ulih munuh orang indu di menua tu pengudah penyakit riman tusu.

“Berindik ari nya, kami endang ngemeratka orang indu kelebih agi di menua pesisir beperesa pengerai dikena nyeliah sereta nemu sekalika sida bisi ngembuan igi penyakit tu tauka enda,” ku iya.

Entara aktiviti ke bisi dipejalaika semanjai program tu iya nya Zumba, licha pengerai ari Dr Flora, chabut tikit benasit sereta ke endang dikemeratka iya nya beperesa Pap Smear. Program tu bepun ari pukul 7.30 pagi lalu tembu urung pukul 3 lemai.

Ba kenang ke bukai, Program Pelajar Pengerai begulai enggau komuniti tu mega iya nya seiti ari subjek ke enda tau enda digaga raban indu misi pematih ti ngambi Program Diploma Lanjutan. Batang tuju subjek tu iya nya dikena nentuka sida nemu bakani chara ngatur program begulai enggau komuniti ti nyadi pemerat Opis Pengerai.

“Program ti baka tu endang seruran dipejalai piak kami iya nya entara pematih program begulai enggau kelinik pengerai ngambika ngajar sida ti enggau program Diploma Lanjutan tu chara ngatur pengawa bekimpin ke baka tu,” pia ku seiku ari pengajar program Diploma Kejururawatan Puan Dayang Mardiah .

Entara ke bisi datai rambau progam nya Ketuai Program Pengkhususan enggau Diploma Lanjutan KSKB Jidah Padang, Ketuai Program Diploma Kejururawatan Beatrice Afrin Freni, Sister Lucy Mandoh sereta staff KKIA RCBM ke bukai.

LICHA PENGERAI: Dr Flora meri licha pengerai pasal penyakit riman serviks ngagai bala pesereta.

UNGKUP ALBUM: Dr Flora (duduk tengah), Jidah Padang (dua kiba), Beatrice (kiba), Sister Lucy (dua kanan) enggau Dayang Mardiah (kanan) begambar bebala mayuh enggau pematih ke udah ngatur program nya.

KAMI UDAH: Pesereta program begambar begulai sepengudah aktiviti Zumba.

BEJADI: Dr Flora udah bejadi Program Pelajar Pengerai seraya dikemata Jidah Padang sereta temuai ke bukai.

AKU BULIH!: Seiku ari pesereta program nerima perais ti pemadu besai ari Sister Lucy Mandoh rambau program nya.

TIKIT BENASIT: Entara aktiviti ke bisi digaga iya nya Nyabut Tikit Benasit dikena matak mensia mayuh nyereta program nya.