Malaysia menua ti likun endur ngelantang ati
Mayuh temuai ari menua luar randa kitu laban ngembuan mayuh bansa sereta likun, ku Harden
SRI AMAN: Malaysia sebuah menua ti seruran ditapatka temuai nyadi palan endur nemuai sereta endur ngelantangka ati laban menua tu endang ditemu lantang sereta likun digusung.
Menteri Muda Pengelantang Komuniti Sarawak Datuk Francis Harden Hollis madahka, Malaysia mega tebilang enggau mayuh macham adat, main asal sereta penyerakup pupu bansa ti nguan menua tu.
“Pekara tu ti ngasuh Malaysia dipeda nyelai laban rayat menua tu ulih idup likun sereta nelap enggau pangan diri.
“Tetiap temuai ke bisi datai ngagai menua tu udah tentu deka nusi pemanah enggau penyiru peranak menua tu maya mulaika diri ngagai menua sida empu,” ku iya.
Iya ke mega Kaban Kunsil Nengeri (ADUN) Simanggang mansutka jaku nya rambau bejadika Pengawa Nyuaka Perais Pekit Pintu Gerbang enggau Berambeh Hari Raya Aidilfitri 2017 ke diatur Komiti Pengelantang Pendiau Islam Ketuai Komuniti enggau Ketuai Raban Bansa ungkup sitak Kunsil Nengeri (DUN) Simanggang bepalan di Dewan Suarah Sri Aman, kena malam Hari Enam tu tadi.
“Perintah andal amat ngambika penyerakup enggau pengelatang seruran bisi ti ulih pulaika pemaik semua bansa ti nguan menua tu.
“Nya alai, pemisi gerempung baka Komiti Pemansang Enggau Pengelikun Genturung Pendiau ( JKKK), Kawasan Rukun Tetangga (KRT), PERWANI, Komuniti 1Malaysia (K1M) enggau ke bukai nyadi sebengkah gerempung ari pupu bansa ti terus ngetanka penyerakup sereta kerajasama enggau pangan diri seruran diter- enak,” ku iya nyemetak.
Berebak enggau nya ku iya, tetiap kaban dalam gerempung tu patut ngembuan mayuh penemu ba semua pekara sekalika ari sukut politik, ekonomi enggau ngaul pemanah ulah nyadi ‘senyata’ besai dalam pengawa komuniti seraya nyadi ejen ngenataika penerang ngagai rayat lalu sida tu mih deka nyadi teladan ngagai komuniti ke bisi ngelingi sida.
“Kitai pechaya, gerempung ke bansa tu nyadi tiang ngenegapka penyerakup bansa ulih ngubah rayat entuka juluk Gagasan 1Malaysia ulih dijapai nengah kaul pupu bansa di serata menua ba tetiap aktiviti ti diatur perintah, lalu tu ngetanka penyerakup dalam pengelain.
Berindik ari nya, aram kitai bela beserakup nyingkang begulai ngemansangka menua Malaysia enggau nengeri Sarawak pulaika pemaik kitai semua.
Sama bisi datai Residen Bagi Menua Sri Aman, Indit Bangai, Pemesai Pengatur Pengawa Opis Pelilih Sri Aman, Hamizan Yahya, Pemancha Lee Siang Hua, Penghulu Abdul Samad Abdul Rahim sereta bala ketuai raban bansa Melayu ke bukai.
Berebak enggau pengawa sehari nya, Harden bisi nyuaka agih belanja penyampau RM17,500 ti nyadi perais Pekit Pintu Gerbang enggau Berambeh Hari Raya Aidilfitri 2017 ngagai Komiti Pengelantang Islam Ketuai Komuniti enggau Ketuai Raban Bansa ungkup DUN Simanggang.
Harden mega bisi nyuaka geran perintah bela penyampau RM3,000 ngagai 11 buah JKKK, masjit enggau Komiti Pengelantang di DUN Lingga seraya dua buah gempung ke bukai bela nerima RM5,000 lalu kesemua penyampau geran tu manggai RM43,000.
Ngelansa pasal pekit sehari nya, JKKK Kampung Zon Jaya Utara, Kampung Muhibbah Sri Aman ti diketuaika Ketua Kampung, Jolly Rambli dipadu bulih gelar champion lalu pulai ngemai perais Piala Pusingan Francis Harden, Piala Iringan enggau Perais mata duit.
Pekara tu ti ngasuh Malaysia dipeda nyelai laban rayat menua tu ulih idup likun sereta nelap enggau pangan diri. Datuk Francis Harden Hollis Menteri Muda Pengelantang Komuniti Sarawak