Semua rumah patut bisi perengka pemadam api
Tiong: Tu entara perengka ke pemadu beguna maya penusah enda disadang seraya nganti penatai bomba
KUCHING: Tetiap rumah patut bisi nyimpan perengka pemadam api, Ku Pemantu Direktor Bagi Operasyen Opis Bomba Sarawak Tiong Ling Hii.
Bejaku ba pengerami Gawai Raya Bomba Komuniti (BK) ungkup Parlimen Petra Jaya ( P194), Dun Satok( N7) enggau DUN Tupong (N6) di sebengkah hotel malam ensanus, iya madah perengka pemadam enda mar enti dibanding enggau perengka bukai baka ke perengka lektrik.
“Perengka pemadam api tu semina berega RM120 tauka RM130, enda mar baka perengka lektrik tauka telefon binching.
“Tetiap rumah patut bisi nyimpan perengka tu lalu sebengkah perengka ke chukup beguna,” ku iya.
Perengka pemadam api tu semina berega RM120 tauka RM130, enda mar baka perengka lektrik tauka telefon binching. Tiong Ling Hii Pemantu Direktor Bagi Operasyen Opis Bomba Sarawak
Tiong nambah, perengka pemadam dikena madam api arika ngelekai nyadi besai seraya nganti penatai Bomba lalu mantu nyeliah rumah angus.
“Ba rumah panjai, perengka pemadam tu mandangka empas positif ke alai mayuh penusah angus ke baru deka nyadi udah mujur dipadam,” ku Tiong nambah.
Ngenang sentang Bomba Komuniti (BK), iya madah raban BK nyaup opis Bomba ngemudah pengawa madamka api.
Ku iya, BK ukai semina ngeriput penusah angus ke bisi nyadi, tang mega nentuka jalai penama ngagai palan penusah enda tekul.
Kelimpah ari nya, raban BK mega nyaup ngintu pemaik kereban opis Bomba baka ke paip Bomba arika dipenyati.