Empat pampang AADK udah mujur ditambah ba Sarawak
SIBU: Ejensi Anti Dadah Kebangsaan (AADK) Sarawak udah mujur numbuhka empat iti agi pampang opis sida ba nengeri tu.
Direkter AADK Sarawak Wan Madihi Wan Salleh madah, penyampau tu mandangka opis sida diatu udah bisi 11 iti pampang tauka nyauka ba semua sitak ditu.
“Iya ke baru tu iya nya di Serian, Kota Samarahan, Betong enggau Sri Aman.
“Semua pampang opis AADK tu udah bejalaika pengawa berengkah 3 Julai tu tadi,” pia ku iya maya aum media di Sibu, ensana.
Dulu agi ari tu iya bela ngulu Pengerami Nutup Simposium Pendayaupayaan Komuniti ‘Pendekatan Holistik Penyalahgunaan Dadah, Cabaran dan Tindakan Strategik’ ke diatur ba Dewan Suarah Sibu.
Pengerami nya dipenyadika Kaban Kunsil Nengeri ( ADUN) Dudong Datuk Tiong Thai King lalu bela digulu Chairman Kaunsil Pengawa Ngemunas Dadah (MTMD) Sitak Sibu ti mega Residen Sibu Hii Chang Kee.
Nambahka jaku iya, Mahidi mega madah, penumbuh pampang opis nya seririh enggau pengeransing nempa tuju opis sida ditumbuhka.
“Pekara tu dipenyadi seraya kitai bejalaika tanggungpengawa nitihka tiga bengkah pekara iya nya Nyeliah, Ngubat enggau Neritka Adat,” ku iya madah baru.
Ba pekara bekaul, nengah penerang ke diberi, statistik Orang Kena Pengawasan (OKP) AADK Sarawak pun taun tu tadi nyentuk bulan Mei iya nya sepenyampau 6,194 iku.
Taja ba tiga bulan keterubah penyampau nya bisi nurun iya nya ba ari bulan Januari bisi 1,269 nurun ngagai 1,237 ba bulan Februari, Mach (1,208) enggau April (1,205) tang niki baru bulan Mei iya nya 1,275.
Rintai penyampau OKP mayuh dirikodka ari sida ke berumur 22-39 iya nya bisi 3,763 lalu ditangkan nembiak (13-21 taun) iya nya 1,430 enggau besai tuai (40 taun ke atas), 1,001.
Ba bulan Mei mega mandangka sitak Kuching ngerikod 496 ditangkan Samarahan (149), Miri (145), Bintulu (95), Sibu (92), Sarikei (91), Sri Aman (79), Limbang (58), Serian (37), Betong (17) enggau Mukah (16).
Sitak Kapit nadai ngerikod OKP.