Festival Pemakai Sarikei deka diatur 21-30 Julai
SARIKEI: Kaunsil Pelilih Sarikei (SDC) deka ngatur Festival Pemakai Sarikei 2017 ba taba Tama Lama Nyelong, besemak enggau Jubli Mutiara, berengkah ari 21 nyentuk 30 Julai.
Chairperson SDC, Wong Zee Yeng madahka sepenyampau 92 iti lot bisi dibuka ngagai sida ke bisi ati nirika bangsal ngelaku tauka bejualka pemakai sida maya festival sepuluh hari berunggu nya.
Bisi 30 buah bansal diungkup endur ngelakuka resepi enggau pemakai asal, ku iya, seraya nambah, pemerat deka diberi ngagai peminta ari gempung ukai dikuasa perintah (NGO).
Udah nya, 62 lot diungkup ngagai mensia mayuh ke alai 40 iti diungkupka khas ngagai bangsal ‘halal’ lalu 30 da agi ungkup enda ‘halal’, ku iya nerang silik rambau aum pengarang berita pengudah aum komiti pengatur,apin lama ke udah.
Barang sapa ti udah ngambi pom peminta ungkup permit sementara nirika bangsal pemakai sida dipinta nganjung pom ke udah tembu diisi ngagai Seksyen Pengerai Mensia Mayuh SDC lalu pengudah nya mayar bayar servis penyampau RM130 enggau RM20 ungkup permit sementara di Seksyen Pekara Wang kena 17 Julai (Hari Satu), ku iya.
Ba lansa ke sama, bansal pemakai dikemendar buka berengkah ari 21 nyentuk 30 Julai, bemacham aktiviti main asal enggau pengawa lama, pengawa pemerindang enggau pekit ke udah dirintai ungkup 21, 22, enggau 23, ku iya.
Beserimbai enggau pengawa ngelancharka festival tu ti dipenyadi Menteri Muda Perambu Mengeri, Pengatur Tanah enggau Rampa Menua, Datu Len Talif Salleh kena lemai 21 Julai, main asal ‘bemukun’ enggau pemerindang Busker mega deka diatur ku iya nambah.
Sekeda aktiviti ke bukai ungkup 22 Julai iya nya Pekit Nyumpit ti deka dipenyadika Kaban Kunsil Nengeri (ADUN) Meluan, Rolland Duat, Pekit Mandangka Auto enggau Seni Mural ti deka dipenyadika ADUN Repok, Dato Sri Huang Tiong Sii, ku iya ngelansa silik.
Berindik ari pengawa nutup pengerami deka dipenyadi Kaban Parlimen (MP) Tanjong Manis, Datuk Norah Tun Abdul Rahman kena lemai 23 Julai, sesais aerobik pagi, pelanda pengerai, besikal enggau pekit tukang masak spontan deka diatur ti nyadi sekeda ari rintai program sehari nya, ku iya nambah.
Sekeda bala ke bisi datai Sapit Chairman SDC, Awangku Ibrahim Hossein enggau Chong Nee Nie, ti bediri ungkup Sekretari SDC.