Atur meli rumah PR1MA diatu lebih muntang nengah SPEF

KUCHING: Semua orang ke bisi ngerejista diri meli rumah projek Perumahan Rakyat 1Malaysia (PR1MA) diatu, deka lebih muntang nengah skim eksklusif iya nya Skim Pembiayaan Fleksible (SPEF) PR1MA.

Nitihku penerang ari Serikat PR1MA, skim nya deka mantu orang ti jeman penatai pemisi ngembuan rumah ke diri empu.

Bisi 1.42 jura rayat Malaysia berejista enggau PR1MA, lalu ari penyampau nya bisi 68,000 iku ari Sarawak. Naka ke diatu bisi 166,972 ke berejista serata menua nya udah minta unit rumah PR1MA.

“Skim tu ungkup semua pengerejista ke meli rumah PR1MA, ti nyendiaka penyampau duit ke diinjau lebih tinggi sereta pemeli nya ulih mayar duit ansur tiap bulan nya enggau lebih baruh dibandingka enggau chara injau biasa tauka lama.

“Skim nya dipejalaika enggau kerejasama entara bank menua tu baka Maybank, CIMB, RHB enggau Ambank,” ku pengari PR1MA lebuh ke meri licha ngagai raban pengarang berita.

Kena 15 Jun enggau 16 Jun tu tadi bisi diatur Hari Tebuka PR1MA POD) ngagai orang mayuh berengkah ari pukul 9 pagi ngagai 5 lemai ba Opis PR1MA di Matang.

Nambahka nya pengari PR1MA nya madahka SPEF bisi dua pilih iya nya bayar beperingkat enggau bayar beperingkat sereta ngeluarka Akaun 2 KWSP. Akaun 2 KWSP nya enda ulih ke tuju bukai kelimpah ari kena mayar rumah PR1MA.

Nengah skim tu mega, lima taun keterubah pemeli rumah PR1MA semina patut mayar bungai duit.

“Pemanah skim tu iya nya ulih akses ngagai penyampau injau ke lebih tinggi ari keonvensional nitihka atur enggau syarat sereta bayar tiap bulan ti tetap (bungai duit aja) dalam timpuh lima taun keterubah,” ku iya.

Kelimpah ari nya dalam penerang berita, PR1MA deka ngaga lebih 17,000 unit rumah di Sarawak ti mungkur 15 projek sereta dipelabaka Gross Development Value (GDV) lebih ari RM5.5 billion.

Ari penyampau nya, 1,581 unit ulih dibeli maya hari tebuka PR1MA ke abis kemari.

Lima belas projek PR1MA di Sarawak nyengkaum PR1MA@VIsta Tunku, Kuching (1,832 unit); PR1MA@ Matang 2, Kuching (1,360 unit); PR1MA@Semenggoh, Padawan (1,260 unit); PR1MA@Sibu Baru, Sibu (1,096 unit) enggau PR1MA@Petra Jaya, Kuching (2,058 unit).

PRIMA@Sungai Plan, Bintulu (1,656 unit); PR1MA@ Pending/Bintawa (1,320 unit); PR1MA@Kuala Baram, Miri (1,896 unit); PR1MA@Kota Petra (1,350 unit) enggau PRIMA@ Taman Malihah (746 unit).

PR1MA@Matang bisi nyendiaka rumah bansa A1 enggau A3 iya nya dua bilik enggau dua bilik ai enggau pemesai 910 kaki persegi sereta bansa B1 enggau B2 bisi tiga bilik enggau dua bilik mansi ti enggau pemesai 978 kaki persegi.

“Status projek PR1MA Matang ti bisi 12 blok ke empat tingkat ti berega pemadu murah iya nya RM279,000 diatu status projek manggai 35 peratus lalu projek di Bintawa/Pending ke bisi 10 blok 11 tingkat ti berega pemadu murah RM256,00 diatu status projek urung 30 peratus tembu,” ku pengari PR1MA.